'ना कधी मध्यस्थी स्वीकारली आणि भविष्यातही स्वीकारणार नाही'; पंतप्रधान मोदींचा ट्रम्प यांना कॉल, काश्मीर मुद्द्यावर स्पष्ट मेसेज

PM Modi Donald Trump News: अमेरिकेचा मध्यस्थी करण्याचा प्रस्ताव भारताला मान्य नसल्याचे पंतप्रधान मोदींनी अमेरिकेला सांगितले. मोदी आणि ट्रम्प यांची कॉलवर चर्चा झाली, त्यामुळे त्यांनी हा मुद्दा मांडला. 

PM Modi Donald Trump Latest News : पंतप्रधान नरेद्र मोदी यांनी बुधवारी (१८ जून) अमेरिकेचे राष्ट्राध्यक्ष डोनाल्ड ट्रम्प यांच्यासोबत फोनवरून चर्चा केली. ३५ मिनिटं दोन्ही नेत्यांमध्ये संवाद झाला. यावेळी पंतप्रधान नरेंद्र मोदी यांनी काश्मीर मुद्द्यावर मध्यस्थी स्वीकारली जाणार नाही, अशी स्पष्ट भूमिका डोनाल्ड ट्रम्प यांच्यासमोर मांडली. भारत आणि पाकिस्तान यांच्यात कुणीचीही मध्यस्थी भारताने ना कधी स्वीकारली, ना कधी स्वीकारणार, असे मोदी म्हणाले. 

'लोकमत'चं WhatsApp चॅनल फॉलो करा!

पंतप्रधान नरेंद्र मोदी जी७ शिखर परिषदेसाठी कॅनडाच्या दौऱ्यावर आहेत. या दौऱ्यातच पंतप्रधान मोदी आणि अमेरिकेचे अध्यक्ष डोनाल्ड ट्रम्प यांची बैठक होणार होती. पण, डोनाल्ड ट्रम्प मध्येच दौरा सोडून अमेरिकेत परतले. 

ट्रम्प यांच्याशी मोदींची फोन कॉलवरून चर्चा

भारताचे परराष्ट्र सचिव विक्रम मिस्री यांनी दिलेल्या माहितीप्रमाणे, पंतप्रधान मोदी आणि अध्यक्ष डोनाल्ड ट्रम्प यांच्यात कॉलवरून ३५ मिनिटे चर्चा झाली. यावेळी पंतप्रधान मोदी यांनी दहशतवादाबद्दल भारताची भूमिका स्पष्ट केली. त्याचबरोबर पहलगाम हल्ल्यानंतर निर्माण झालेल्या तणावाबद्दलही ते बोलले. 

युद्ध थांबवण्यासाठी व्यापाराबद्दल कोणतीही चर्चा झाली नाही

पंतप्रधान मोदींनी ट्रम्प यांना सांगितले की, संपूर्ण घटनाक्रमामध्ये कधीही आणि कोणत्याही पातळीवर भारत-अमेरिकेतील व्यापार करार किंवा अमेरिकेकडून भारत आणि पाकिस्तानमध्ये मध्यस्थ करण्यासंदर्भात चर्चा झाली नाही. तणाव कमी करण्यासाठी भारत आणि पाकिस्तान यांच्यातच चर्चा झाली होती. ही चर्चाही पाकिस्तानने आग्रह केल्यानंतर झाली, असे मोदी ट्रम्प यांना म्हणाले. 

काश्मीर मुद्द्यावर मध्यस्थी नको

पाकव्याप्त काश्मीरचा मुद्द्यावर तोडगा काढण्यासाठी भारताने कधीही तिसऱ्या देशाला मध्यस्थी करण्याबद्दल विचारले ननाही आणि कधीही अशी मध्यस्थी स्वीकारणार नाही, असे मोदी ट्रम्प यांच्याशी बोलताना म्हणाले. 

वाचा >>"युद्धाला सुरुवात झालीय, आता कोणतीही दया नाही"; खामेनींनी इस्रायलविरुद्ध केली युद्धाची घोषणा

डोनाल्ड ट्रम्प यांनी पंतप्रधान मोदी यांच्याकडून मांडण्यात आलेले मुद्दे समजून घेतले. भारताच्या दहशतवाद विरोधातील लडाईला ट्रम्प यांनी पाठिंबा दिला. भारताचे ऑपरेशन सिंदूर अजूनही सुरूच असल्याचेही मोदींनी ट्रम्प यांना सांगितले. 

अमेरिकेत येऊ शकता का?

अमेरिकेचे अध्यक्ष डोनाल्ड ट्रम्प यांनी कॉलवरील चर्चेदरम्यान पंतप्रधान मोदी यांना कॅनडा दौऱ्यावरून परतताना अमेरिकेत येऊ शकता का? अशी विचारले. पण, मोदींनी असमर्थता दर्शवली. पूर्व नियोजित कार्यक्रमामुळे अमेरिकेत येता येणार नाही, असे मोदी म्हणाले. त्यावर भविष्यात भेटण्याचा प्रयत्न करू असे दोन्ही नेते म्हणाले.