Middle East War: युद्ध भडकण्याची चिन्हं! इस्रायलचा इराणच्या शिया मशिदीवर भीषण हल्ला, ३ जण ठार

America Israel Iran Conflict: मध्यपूर्वेतील युद्ध परिस्थिती दिवसेंदिवस भीषण होत चालली असून अमेरिका आणि इस्रायलने इराणवर आपले हल्ले अधिक तीव्र केले.

मध्यपूर्वेतील युद्ध परिस्थिती दिवसेंदिवस भीषण होत चालली असून अमेरिका आणि इस्रायलनेइराणवर आपले हल्ले अधिक तीव्र केले. ताज्या घडामोडीत इस्रायलनेइराणच्या इस्फहान शहराला पुन्हा एकदा लक्ष्य करत मोठा बॉम्बहल्ला केला आहे. या युद्धाचा शेवट नेमका कधी आणि कसा होईल, याबाबत सध्या अनिश्चितता कायम आहे. याच पार्श्वभूमीवर इराणने इस्रायलवर गंभीर आरोप केले आहेत. अमेरिका आणि इस्रायलने जाझान शहरातील एका शिया मशि‍दीवर बॉम्ब हल्ला केल्याचा इराणने दावा केला आहे. 

एकीकडे युद्धविरामाच्या अफवा पसरत असताना दुसरीकडे दोन्ही बाजूंनी हल्ल्यांचा वेग वाढला आहे. इराणने अमेरिका आणि इस्रायलवर अत्यंत गंभीर आरोप केले आहेत. इराणच्या दाव्यानुसार, अमेरिका आणि इस्रायलने जाझान शहरातील एका शिया मशिदीला लक्ष्य केले आहे. या हल्ल्यात तीन नागरिकांचा मृत्यू झाल्याचे इराणने म्हटले आहे. प्रत्युत्तर म्हणून इराणकडूनही इस्रायली आणि अमेरिकन तळांवर क्षेपणास्त्रे व ड्रोनचा वर्षाव केला जात आहे.

इस्रायली आरोग्य मंत्रालयाने युद्धात होणाऱ्या नुकसानीची ताजी आकडेवारी जाहीर केली आहे. इराणमध्ये गेल्या २४ तासांत १०४ लोक जखमी झाले असून त्यांना विविध रुग्णालयात दाखल करण्यात आले आहे. युद्ध सुरू झाल्यापासून आतापर्यंत जखमी झालेल्या इस्रायली नागरिकांची संख्या ६ हजार २८६ वर पोहोचली आहे. यापैकी १०० जणांवर अद्याप रुग्णालयात उपचार सुरू आहेत. मध्य इस्रायलमध्ये नुकत्याच झालेल्या जीवितहानीचा आकडा यात अद्याप समाविष्ट करण्यात आलेला नाही.

अमेरिकेचे अध्यक्ष डोनाल्ड ट्रम्प बुधवारी संध्याकाळी प्राइम टाइममध्ये देशाला संबोधित करून इराण युद्धाबाबत महत्त्वाची माहिती देणार आहेत. मात्र, त्यापूर्वीच त्यांनी मित्रराष्ट्रांबाबत आपली नाराजी उघडपणे व्यक्त केली आहे. ट्रम्प म्हणाले की, होर्मुझची सामुद्रधुनी खुली ठेवण्याची जबाबदारी केवळ अमेरिकेची नाही. जे देश तेलासाठी या मार्गावर अवलंबून आहेत, त्यांनी आपली जबाबदारी स्वतः पार पाडावी. अमेरिकेच्या युद्ध प्रयत्नांना पूर्ण पाठिंबा न देणाऱ्या देशांवर ट्रम्प यांनी ताशेरे ओढले आहेत.