इराण युद्धात मेलोनी यांचा ट्रम्प यांना झटका; इटलीनं अमेरिकन फायटर जेटची विनंती फेटाळली

मेलोनी या युरोपातील एकमेव व्यक्ती आहेत ज्यांना ट्रम्प यांनी त्यांच्या शपथविधी कार्यक्रमात आमंत्रित केले होते.

इराण युद्धात इटलीने अमेरिकेला मोठा झटका दिला आहे. मध्य पूर्वेच्या दिशेने जाणाऱ्या एका अमेरिकन लढाऊ विमानाला इटली सरकारने सिसली येथे उतरण्यास मज्जाव केला. इटलीच्या सरकारने इराण युद्धापासून दूर राखण्याचा निर्णय घेतला आहे. ही पहिलीच वेळ आहे जेव्हा जॉर्जिया मेलोनी यांच्या सरकारने डोनाल्ड ट्रम्प प्रशासनाविरोधात निर्णय घेतला आहे.

रिपोर्टनुसार, सिसलीमध्ये अमेरिकन विमानांनी लँडिंगची परवानगी मागितली होती परंतु इराणने ती नाकारली. त्यामुळे अमेरिकन सैन्य मोहिमेवर त्याचा परिणाम होऊ शकतो. मध्य पूर्वेतील मिशनसाठी सिसली धोरणात्मक ठिकाण आहे. विशेष म्हणजे एक दिवसाआधीच स्पेनने अमेरिकन विमानांसाठी त्यांची एअरस्पेस बंद केली होती. आता इटलीने अमेरिकन विमानांना लँडिंगची परवानगी नाकारली. इटलीचा हा निर्णय महत्त्वाचा मानला जातो कारण इटली नाटो देशाचा सदस्य आहे. युरोपात इटलीचं वर्चस्व आहे. सोबतच पंतप्रधान जॉर्जिया मेलोनी या अमेरिकन राष्ट्रपती डोनाल्ड ट्रम्प यांच्या निकटवर्तीय मानल्या जातात. मेलोनी या युरोपातील एकमेव व्यक्ती आहेत ज्यांना ट्रम्प यांनी त्यांच्या शपथविधी कार्यक्रमात आमंत्रित केले होते. अनेकदा मेलोनी यांनी ट्रम्प यांना वाचवण्याचं काम केले. मात्र इराण युद्धात इटलीच्या या निर्णयाने अमेरिकेला धक्का बसला आहे.

इटलीने हा निर्णय का घेतला?

इटलीने या प्रकरणी अधिकृत निवेदन जारी केलेले नाही, परंतु हा निर्णय इटलीतील नुकत्याच झालेल्या निवडणुकीशी जोडला जात आहे. यात मेलोनी यांच्या पक्षाचा दारुण पराभव झाला. या पराभवामागे इराण युद्ध हे एक कारण असल्याचे सांगितले जात आहे. जनमत चाचणीच्या संदर्भात घेण्यात आलेल्या अनेक सर्वेक्षणांमधून मेलोनी यांच्या ट्रम्प यांच्यासोबतच्या मैत्रीमुळे बहुतेक इटालियन नागरिक नाराज आहेत. इराण युद्धामुळे आर्थिक अडचणी येतील अशी भीती त्यांना वाटते. इटलीमध्ये पुढील वर्षी सार्वत्रिक निवडणुका होणार असून त्यात मेलोनी पंतप्रधानपदाच्या दुसऱ्या कार्यकाळासाठी निवडणूक लढवणार आहेत.