खामेनेईंवर कोसळणार होते इस्रायली मिसाईल; डोनाल्ड ट्रम्प यांनी थांबवलं म्हणून...

याआधी, इराण आणि इस्रायलमधील वाढत्या संघर्षादरम्यान अमेरिकेचे अध्यक्ष डोनाल्ड ट्रम्प यांनी तेहरानला कडक शब्दांत इशारा दिला होता.

इस्रायल आणि इराणमधील वाढत्या तणावामध्ये एक मोठा खुलासा समोर आला आहे. अमेरिकन वृत्तसंस्था रॉयटर्सने दोन अमेरिकन अधिकाऱ्यांच्या हवाल्याने दिलेल्या वृत्तानुसार, इस्रायलचे पंतप्रधान बेंजामिन नेतान्याहू यांनी गेल्या दोन दिवसांत इराणचे सर्वोच्च नेते अयातुल्ला अली खामेनेई यांना लक्ष्य करण्याची योजना आखली होती. मात्र, अमेरिकेचे अध्यक्ष डोनाल्ड ट्रम्प यांनी नेतान्याहू यांना ही योजना प्रत्यक्षात आणण्यापासून रोखले, असे रॉयटर्सने म्हटले आहे.

याआधी, इराण आणि इस्रायलमधील वाढत्या संघर्षादरम्यान अमेरिकेचे अध्यक्ष डोनाल्ड ट्रम्प यांनी तेहरानला कडक शब्दांत इशारा दिला होता.

डोनाल्ड ट्रम्प यांचा इराणला थेट इशारा

डोनाल्ड ट्रम्प यांनी त्यांच्या सोशल मीडिया प्लॅटफॉर्म 'ट्रुथ सोशल'वर एक पोस्ट शेअर करत म्हटले होते की, "जर इराणने आमच्यावर कोणत्याही प्रकारे हल्ला केला, तर अमेरिकन सैन्य त्यावर अशा प्रकारे हल्ला करेल जो यापूर्वी कधीही पाहिला नसेल." तसेच, मध्यपूर्वेतील सध्याच्या संघर्षावर राजनैतिक तोडगा काढणे शक्य असल्याचेही त्यांनी नमूद केले. ते म्हणाले, "आपण इराण आणि इस्रायलमध्ये सहजपणे करार करू शकतो आणि हा संघर्ष संपवू शकतो."

इराणच्या इशाऱ्यानंतर ट्रम्प संतापले

रॉयटर्सच्या वृत्तानुसार, अमेरिकेचे अध्यक्ष डोनाल्ड ट्रम्प यांनी इराणला हा इशारा तेव्हा दिला, जेव्हा तेहरानने अमेरिका, ब्रिटन आणि फ्रान्सला धमकावले होते. जर, त्यांनी इस्रायलवर इराणी हल्ला रोखण्यास मदत केली, तर इराण या प्रदेशातील सर्व देशांच्या लष्करी तळांना आणि इतर संस्थांना लक्ष्य करेल, असे इराणने म्हटले होते.

रविवारी (१५ जून) डोनाल्ड ट्रम्प यांनी इराण आणि इस्रायलला करार करून हा संघर्ष पूर्णपणे संपवण्याचे आवाहन केले. आपल्या हस्तक्षेपामुळे अनेक संघर्षग्रस्त देशांमध्ये शांतता प्रस्थापित झाल्याचेही त्यांनी सांगितले. पण याचे श्रेय आपल्याला कधीच मिळाले नाही, अशी खंतही त्यांनी व्यक्त केली.

या घडामोडींमुळे मध्यपूर्वेतील भू-राजकीय परिस्थिती अधिकच गुंतागुंतीची झाली असून, आंतरराष्ट्रीय समुदायाचे लक्ष या संघर्षावर टिकून आहे. ट्रम्प यांच्या या भूमिकेमुळे हा तणाव काही प्रमाणात कमी होईल का, याकडे सगळ्यांचे लक्ष लागले आहे.