'आमच्या देशाकडे पाहिलं तरी डोळे काढून...’, पाकिस्तानच्या परराष्ट्रमंत्र्यांची इस्राइलला धमकी

Israel Iran Conflict: इराण अणुबॉम्ब तयार करत असल्याच्या संशयावरून तेथील अणुकेंद्र आणि अणुशास्त्रज्ञांना लक्ष्य करणारा इस्राइल अण्वस्त्रसंपन्न देश असलेल्या पाकिस्तानवरही हल्ला करू शकतो, असा दावा केला जात आहे. त्या पार्श्वभूमीवर पाकिस्तानमधून आक्रमक प्रतिक्रिया उमटत आहेत.

सध्या इस्त्राइल आणि इराण यांच्यात सुरू असलेल्या संघर्षामध्ये इराणचा शेजारील देश असलेल्या पाकिस्तानच्या भूमिकेचीही आंतरराष्ट्रीय पातळीवर चर्चा सुरू आहे. इराण अणुबॉम्ब तयार करत असल्याच्या संशयावरून तेथील अणुकेंद्र आणि अणुशास्त्रज्ञांना लक्ष्य करणारा इस्राइल अण्वस्त्रसंपन्न देश असलेल्या पाकिस्तानवरही हल्ला करू शकतो, असा दावा केला जात आहे. त्या पार्श्वभूमीवर पाकिस्तानमधून आक्रमक प्रतिक्रिया उमटत आहेत. आमच्या देशाकडे नुसतं वाकड्या नजरेनं पाहिलं तरी आम्ही इस्राइलचे डोळे काढून देऊ, असा इशारा पाकिस्तानचे परराष्ट्र मंत्री इशाक डार यांनी इस्राइलला दिला आहे.

पाकिस्तान आमच्यासाठी इस्राइलवर अणुबॉम्ब टाकू शकतो, असा दावा इराणच्या एका लष्करी अधिकाऱ्याने केला होता. त्यावर स्पष्टीकरण देताना डार म्हणाले की, जर कुणी आमच्याकडे वाकड्या नजरेनं पाहिलं तर त्याचे डोळे फोडून टाकले जातील. जगाने हे पाहिलेलं आहे. त्यामुळे इस्राइलने पाकिस्तानकडे पाहण्याचीही हिंमत करू नये. जर इस्राइलने अशी आगळीक केली, तर विटेला दगडाने प्रत्युत्तर देण्याची क्षमता पाकिस्तानमध्ये आहे, असा इशारा त्यांनी दिला.

इराणी सैन्याचे वरिष्ठ अधिकारी असलेल्या जनरल मोहसिन रेजाई यांनी पाकिस्तानकडे असलेल्या अणुबॉम्बवरून मोठं विधान केलं होतं. ते म्हणाले होते की, जर इस्राइलने इराणवर अणुबॉम्ब टाकला, तर पाकिस्तान इस्राइलवर अणुहल्ला करेल. मात्र या दाव्याची चर्चा सुरू होताच पाकिस्तानच्या तोंडचं पाणी पळालं आणि पाकिस्तानचे नेते आणि अधिकाऱ्यांना स्पष्टीकरण देण्यास सुरुवात केली आहे. दरम्यान, इशाक डार यांनी पाकिस्तानकडील अण्वस्त्रं ही केवळ पाकिस्तानसाठीच असल्याचेही स्पष्ट केलं होतं.