तिसऱ्या महायुद्धाचे सावट! इराणचा तीन NATO देशांवर हल्ला; फ्रान्सचा कारवाईचा इशारा...

Iran Crisis: मध्यपूर्वेतील परिस्थिती आणखी चिघळण्याची शक्यता आहे.

Iran Crisis: मध्यपूर्वेत सुरू असलेला संघर्ष आता अत्यंत गंभीर वळणावर पोहोचला असून, परिस्थिती आणखी चिघळण्याची शक्यता व्यक्त केली जात आहे. गेल्या 48 तासांत इराणने NATO सदस्य असलेल्या फ्रान्स, इटली आणि तुर्कीच्या लष्करी तळांवर हल्ले केल्याची माहिती समोर आली आहे. या घटनांमुळे प्रादेशिक तणाव तीव्र झाला असून, NATO थेट युद्धात उतरू शकते, अशी भीती व्यक्त केली जात आहे.

इरबिलजवळ फ्रेंच सैनिकाचा मृत्यू

मिळालेल्या माहितीनुसार, इराकमधील कुर्दिस्तान भागातील लष्करी तळांवर, तसेच तुर्कीतील महत्त्वाच्या एअरबेसवर मिसाइल आणि ड्रोन हल्ले करण्यात आले. सर्वात गंभीर घटना इराकमधील इरबिलजवळ घडली. येथे इराण समर्थित मिलिशियाच्या ड्रोन हल्ल्यात फ्रान्सच्या एका सैनिकाचा मृत्यू झाला. फ्रेंच सैन्याच्या माहितीनुसार, इरबिलपासून सुमारे 40 किलोमीटर अंतरावर असलेल्या प्रशिक्षण केंद्रात फ्रेंच सैनिक कुर्द लढवय्यांना ISIS विरोधातील लढाईचे प्रशिक्षण देत होते. 

यादरम्यान झालेल्या ड्रोन हल्ल्यात फ्रेंच अधिकारी अर्नो फ्रेयन यांचा मृत्यू झाला, तर किमान सहा सैनिक जखमी झाल्याची माहिती आहे. या घटनेनंतर फ्रान्सचे राष्ट्राध्यक्ष इमॅन्युएल मॅक्रॉन यांनी तीव्र प्रतिक्रिया देत सांगितले की, दहशतवादाविरोधात लढणाऱ्या सैनिकांवर हल्ला करणे अस्वीकार्य असून, या घटनेसाठी जबाबदार असलेल्या लोकांना कठोर उत्तर दिले जाईल.

इटलीच्या तळालाही लक्ष्य

दरम्यान, इरबिलमधील आणखी एका लष्करी तळावरही मिसाइल हल्ला करण्यात आला. या तळावर इटलीचे सैनिक तैनात आहेत. प्राथमिक माहितीनुसार बेसच्या परिसरात स्फोट झाला असला तरी कोणतीही जीवितहानी झाल्याची माहिती नाही. लष्करी अधिकाऱ्यांच्या मते, हा हल्लाही इराण समर्थित गटांनीच केल्याचा संशय व्यक्त केला जात आहे.

तुर्कीतील इन्किर्लिक एअरबेसवर मिसाइल

तिसरा हल्ला तुर्कीतील प्रसिद्ध इन्किर्लिक एअरबेसवर करण्यात आला. हा एअरबेस NATO साठी अत्यंत महत्त्वाचा मानला जातो आणि येथे अमेरिका व सहयोगी देशांचे सैन्य तैनात असते. मिळालेल्या माहितीनुसार, इराणकडून डागण्यात आलेली मिसाइल NATO च्या हवाई संरक्षण प्रणालीने हवेतच अडवली, त्यामुळे मोठे नुकसान टळले. मात्र या घटनेनंतर संपूर्ण प्रदेशात सुरक्षा अलर्ट वाढवण्यात आला आहे.

NATO च्या सहभागाची शक्यता

NATO सदस्य देशांच्या तळांवर थेट हल्ले झाल्यामुळे हा संघर्ष आंतरराष्ट्रीय पातळीवर अधिक मोठ्या युद्धात बदलू शकतो, अशी भीती तज्ज्ञ व्यक्त करत आहेत. परिस्थितीवर जगभरातील देश बारकाईने लक्ष ठेवून आहेत.