रशियन राष्ट्राध्यक्ष पुतीन भारत दौऱ्यावर येण्याआधी मंत्री जयशंकर मॉस्कोत, काय झाली चर्चा?

India Russia Relations: पुढील महिन्यात रशियाचे अध्यक्ष पुतिन नवी दिल्लीत येणार आहेत

India Russia Relations: रशियाचे राष्ट्राध्यक्ष पुतिन यांच्या भारत भेटीपूर्वी, परराष्ट्र मंत्री एस. जयशंकर मॉस्को येथे पोहोचले. त्यांनी रशियाचे परराष्ट्र मंत्री सर्गेई लावरोव्ह यांची भेट घेतली आणि दोन्ही देशांमधील द्विपक्षीय भागीदारीबद्दल चर्चा केली. त्यांनी २३ व्या वार्षिक भारत-रशिया शिखर परिषदेच्या तयारीचाही आढावा घेतला. "मॉस्कोमध्ये परराष्ट्र मंत्री सर्गेई लावरोव्ह यांना भेटून आनंद झाला. व्यापार आणि गुंतवणूक, ऊर्जा, गतिशीलता, शेती, तंत्रज्ञान, संस्कृती आणि लोकांमधील देवाणघेवाण यासह आमच्या द्विपक्षीय भागीदारीवर चर्चा केली," असे त्यांनी X वरील एका पोस्टमध्ये नमूद केले.

रशियाचे परराष्ट्र मंत्री सर्गेई लावरोव्ह यांच्याशी भेट

पुढील महिन्यात रशियाचे अध्यक्ष पुतिन यांच्या नवी दिल्ली भेटीदरम्यान संबंध अधिक मजबूत करण्यासाठी भारत आणि रशिया अनेक करार, उपक्रम आणि प्रकल्प मजबूत करण्याचा विचार करत आहेत. या भेटीच्या तयारीचा एक भाग म्हणून, परराष्ट्र मंत्री एस. जयशंकर यांनी मॉस्कोमध्ये त्यांचे रशियन समकक्ष सर्गेई लावरोव्ह यांच्याशी व्यापक चर्चा केली. बैठकीतील भाषणात जयशंकर म्हणाले, "२३ व्या वार्षिक शिखर परिषदेसाठी राष्ट्रपती पुतिन यांच्या भारत भेटीची तयारी करत असताना हा विशेष प्रसंग माझ्यासाठी आणखी महत्त्वाचा बनला आहे.

Glad to meet FM Sergey Lavrov today in Moscow.

Held discussions on our bilateral partnership covering trade and investment, energy, mobility, agriculture, technology, culture and people to people exchanges.

Exchanged perspectives on regional, global and multilateral issues.… pic.twitter.com/Bn8xmoW7Jl

— Dr. S. Jaishankar (@DrSJaishankar) November 17, 2025

"विविध क्षेत्रांमध्ये अनेक द्विपक्षीय करार, उपक्रम आणि प्रकल्पांवर चर्चा सुरू आहे. येत्या काही दिवसांत त्यांना अंतिम रूप देण्याची आमची अपेक्षा आहे. आगामी भेट ही आमच्या विशेष आणि धोरणात्मक भागीदारीला अधिक बळकटी देईल आणि आकार देईल असा मला विश्वास आहे," असे ते म्हणाले.

रशिया-युक्रेन संघर्ष संपवण्याच्या प्रयत्नांना पाठिंबा

जयशंकर यांनी असेही सांगितले की भारत हा रशिया-युक्रेन संघर्ष संपवण्याच्या अलिकडच्या प्रयत्नांना पाठिंबा देतो. त्यांनी पुढे म्हटले की भारत शांततेचे समर्थन करतो. त्यामुळे युद्ध थांबले पाहिजे या विचारांना भारताचाही पाठिंबा आहे. आम्हाला आशा आहे की सर्व देश या ध्येयाकडे रचनात्मकपणे वाटचाल करतील."

दरम्यान, डिसेंबरमध्ये पुतिन भारत दौऱ्यावर येण्याची शक्यता आहे.