एपस्टीन फाइल : महिलेने केलेल्या आरोपांची कागदपत्रे लपवली! अमेरिकेच्या न्याय विभागावर आरोप

एका अज्ञात महिलेने ट्रम्प यांच्यावर केलेल्या आरोपांच्या मुलाखतींचे गोषवारे यातून गायब आहेत. एपस्टीन आणि ट्रम्प या दोघांनी आपले लैंगिक शोषण केले होते, असे आरोप त्या महिलेने केले होते.

वॉशिंग्टन : जेफ्री एपस्टीन प्रकरणाशी संबंधित काही महत्त्वपूर्ण कागदपत्रे सार्वजनिक करताना ती दडपल्याचा आरोप अमेरिकेच्या न्याय विभागावर होत आहे. यामध्ये प्रामुख्याने राष्ट्राध्यक्ष डोनाल्ड ट्रम्प यांच्यावर एका महिलेने केलेल्या आरोपांच्या कागदपत्रांचा समावेश असून या प्रकरणाची आता चौकशी सुरू करण्यात आली आहे.

गेल्या महिन्यात न्याय विभागाने एपस्टीनशी संबंधित ३० लाख कागदपत्रे प्रसिद्ध केली. मात्र, अनेक वृत्तसंस्थांनी असा दावा केला की, एका अज्ञात महिलेने ट्रम्प यांच्यावर केलेल्या आरोपांच्या मुलाखतींचे गोषवारे यातून गायब आहेत. १९८० च्या दशकात अल्पवयीन असताना एपस्टीन आणि ट्रम्प या दोघांनी आपले लैंगिक शोषण केले होते, असे आरोप त्या महिलेने केले होते.

'इकॉनॉमिक फोरम'चे अध्यक्ष बोर्ग ब्रेंडे यांनी दिला राजीनामा

जिनिव्हा : वर्ल्ड इकॉनॉमिक फोरमचे (डब्ल्यूईएफ) अध्यक्ष आणि मुख्य कार्यकारी अधिकारी बोर्ग ब्रेंडे यांनी गुरुवारी आपल्या पदाचा राजीनामा दिला. लैंगिक गुन्हेगार जेफ्री एपस्टीनसोबतच्या त्यांच्या कथित संबंधांची स्वतंत्र चौकशी सुरू झाल्यानंतर अवघ्या काही आठवड्यांतच त्यांनी हा निर्णय घेतला.

ब्रेडे यांनी एपस्टीनसोबत तीन व्यावसायिक मेजवान्यांना हजेरी लावली होती. त्यांच्यात ई-मेल आणि संदेशांद्वारे संवाद झाल्याचेही समोर आले आहे.