Donald Trump on Pete Hegseth: इराणसोबतच्या युद्धाला आता २८ दिवस पूर्ण झाले आहेत. मात्र, हे युद्ध नेमके का सुरू झाले आणि त्याचा शेवट काय? या प्रश्नांवर अमेरिका अजूनही गोंधळलेलीच दिसत आहे. अशातच राष्ट्राध्यक्ष डोनाल्ड ट्रम्प यांनी आता युद्धाच्या जबाबदारीचे खापर थेट आपल्या बाजूला बसलेल्या संरक्षण मंत्र्यांवर फोडल्याने सर्वांनीच आश्चर्य व्यक्त केलं आहे.
तेनेसी येथे आयोजित एका राऊंडटेबल बैठकीत ट्रम्प यांनी युद्धाच्या सुरुवातीचा एक नवा किस्सा सांगितला. ट्रम्प म्हणाले की, "आम्ही जेव्हा चर्चा करत होतो, तेव्हा सर्वात आधी पीटर हेगसेथ (संरक्षण मंत्री) पुढे आले आणि म्हणाले की, आपण हे करायलाच हवे. इराणकडे अण्वस्त्रे असू शकत नाहीत, हे त्यांचेच शब्द होते." महत्त्वाचे म्हणजे, ट्रम्प यांनी हे विधान केले तेव्हा हेगसेथ त्यांच्या अगदी बाजूलाच बसले होते.
"मी पीटरला फोन केला. मी जनरल केन यांना फोन केला. मी आपल्या अनेक कर्तबगार लोकांशी चर्चा केली. मी त्यांना म्हणालो मध्य पूर्वेमध्ये आपल्यासमोर एक मोठी समस्या उभी आहे. एकतर आपण ती तशीच राहू देऊ शकतो किंवा मग तिथे एक छोटीशी लष्करी मोहीम करून त्या मोठ्या समस्येचा कायमचा निकाल लावू शकतो," असेही ट्रम्प म्हणाले.
'लिटिल जर्नी' की महाभयंकर युद्ध?
ट्रम्प यांच्या मते, हे युद्ध म्हणजे केवळ एक छोटा प्रवास आहे, जो मध्य पूर्वेतील मोठी समस्या संपवण्यासाठी आखला गेला. मात्र, हा छोटा प्रवास आता अमेरिकेसाठी डोकेदुखी ठरत आहे. प्रशासनातील प्रत्येक जण युद्धाचे वेगळे कारण सांगत आहे. इस्रायल हल्ला करणारच होता, म्हणून अमेरिका युद्धात उतरली. इराण अण्वस्त्र डागण्याच्या तयारीत होता, म्हणून हा प्रतिबंधात्मक हल्ला होता अशी कारणे आता समोर येत आहेत.
जेडी व्हान्स नाराज?
या युद्धावरून ट्रम्प प्रशासनात सर्व काही ठीक नसल्याचे आता स्पष्ट झाले आहे. अमेरिकेचे उपराष्ट्राध्यक्ष जेडी व्हान्स हे या युद्धाबाबत फारसे उत्साही नव्हते, अशी कबुली खुद्द ट्रम्प यांनीच दिली आहे. तसेच, नॅशनल काउंटरटेररिझम सेंटरचे प्रमुख जो केंट यांनी तर युद्धाच्या निषेधार्थ राजीनामाच दिला आहे. दुसरीकडे, बेंजामिन नेतन्याहू आणि रूपर्ट मर्डोक यांसारख्या बाहेरील व्यक्तींच्या सल्ल्याने हे युद्ध लादले गेल्याची चर्चा आता अमेरिकेत जोर धरू लागली आहे.
बॉम्ब टाकतच राहू - डोनाल्ड ट्रम्प
युद्धाच्या काळातही ट्रम्प यांनी चर्चेचे दरवाजे उघडे असल्याचे म्हटले आहे. "आम्हाला करार करायला आवडेल. जर चर्चा यशस्वी झाली तर युद्ध थांबवू, नाहीतर आमची इच्छा असेपर्यंत आम्ही बॉम्बफेक सुरूच ठेवू," असे खळबळजनक विधान ट्रम्प यांनी केले आहे. दरम्यान, ट्रम्प यांचे जावई जेरेड कुश्नर हे इराणच्या टॉप नेत्यांशी संपर्कात असल्याचा दावा अमेरिकेने केला आहे, तर इराणने अशा कोणत्याही चर्चेचा स्पष्ट इन्कार केला आहे.
इराणला दिलेली डेडलाईन ट्रम्प यांनी ५ दिवसांनी वाढवली आहे. तसेच आतापर्यंत १३ अमेरिकन सैनिकांचा या युद्धात मृत्यू झाला आहे. इराणचे क्षेपणास्त्र कार्यक्रम आणि ड्रोन निर्मिती पूर्णपणे उद्ध्वस्त करणे, हे अमेरिकेचे मुख्य उद्दिष्ट आहे.
दरम्यान, युद्ध लांबत चालल्याने आता ट्रम्प प्रशासनावर दबाव वाढत आहे. पाच दिवसांची वाढीव मुदत संपल्यानंतर अमेरिका इराणवर आणखी मोठे हल्ले करणार की पडद्यामागून सुरू असलेल्या चर्चेतून काही तोडगा निघणार, याकडे संपूर्ण जगाचे लक्ष लागले आहे.
Web Summary : Trump shifts blame for the Iran war onto his Defense Secretary, Pete Hegseth, claiming Hegseth pushed for it. The war's purpose is debated within the administration, with rising dissent and casualties. Negotiations continue amid threats of continued bombing.
Web Summary : ट्रंप ने ईरान युद्ध का दोष रक्षा मंत्री पीट हेगसेथ पर मढ़ा, दावा किया कि हेगसेथ ने इसके लिए दबाव डाला था। युद्ध के उद्देश्य पर प्रशासन में बहस, असंतोष और हताहतों की संख्या बढ़ रही है। बमबारी की धमकी के बीच बातचीत जारी है।