"इराणचे तेल आमचेच!", खार्ग बेटावर ताबा मिळवण्याचे डोनाल्ड ट्रम्प यांचे संकेत; जागतिक राजकारणात खळबळ

Kharg Island Trump : अमेरिकेचे राष्ट्राध्यक्ष डोनाल्ड ट्रम्प इराणमधील १००० पाउंड यूरेनियम काढण्यासाठी लष्करी कारवाईच्या विचारात आहेत. खार्ग बेटावर ताबा मिळवण्यासह तेलाच्या राजकारणावर ट्रम्प यांचे मोठे विधान.

अमेरिकेचे माजी राष्ट्राध्यक्ष आणि सध्याच्या जागतिक घडामोडींमधील कळीचे नेते डोनाल्ड ट्रम्प यांनी इराणबाबत एक खळबळजनक वक्तव्य केले आहे. 'फायनान्शिअल टाइम्स'ला दिलेल्या मुलाखतीत ट्रम्प यांनी स्पष्ट केले की, त्यांना इराणचे तेल मिळवायचे आहे आणि गरज पडल्यास अमेरिका इराणचे प्रमुख तेल निर्यात केंद्र असलेल्या 'खार्ग बेटावर' ताबा मिळवू शकते. या विधानामुळे मध्य-पूर्वेतील तणाव आणखी वाढण्याची शक्यता निर्माण झाली आहे.

ट्रम्प यांनी मुलाखतीत म्हटले, "खरं सांगायचं तर, माझी सर्वात आवडती गोष्ट म्हणजे इराणचे तेल मिळवणे." खार्ग बेट हे इराणच्या तेल निर्यातीचे मुख्य केंद्र मानले जाते. या बेटावर ताबा मिळवण्याचे संकेत देऊन ट्रम्प यांनी इराणच्या अर्थव्यवस्थेची नाडी आवळण्याची तयारी दर्शवली आहे. तिथून १००० पाउंड यूरेनियम बाहेर काढण्यासाठी मोठ्या लष्करी मोहिमेचा विचार करत असल्याचा खळबळजनक खुलासा केला आहे. यामध्ये अमेरिकन सैन्याला अनेक दिवस इराणच्या भूमीवर राहावे लागू शकते.

पाकिस्तानामार्फत पडद्यामागून हालचाली
विशेष म्हणजे, यावेळी ट्रम्प यांनी इराणसोबत सुरू असलेल्या गुप्त वाटाघाटींचाही खुलासा केला. अमेरिका आणि इराणमध्ये थेट आणि अप्रत्यक्ष चर्चा सुरू असून यामध्ये पाकिस्तानचे 'दूत' मध्यस्थी करत असल्याचे ट्रम्प यांनी सांगितले. ही चर्चा सकारात्मक दिशेने जात असल्याचेही त्यांनी नमूद केले.

होर्मुझची सामुद्रधुनी आणि २० टँकर्सचा करार
इराण आणि पाकिस्तान यांच्यात झालेल्या एका नव्या करारानुसार, पाकिस्तानचा ध्वज असलेले २० मोठे तेल टँकर्स 'होर्मुझच्या सामुद्रधुनीतून' जाण्यास इराणने संमती दिली आहे. इराणच्या संसदेचे सभापती मोहम्मद बाकेर घालिबाफ यांनी या व्यवस्थेला मंजुरी दिली असून, सोमवारपासून हे टँकर्स तेल घेऊन रवाना होतील, असे ट्रम्प यांनी सांगितले. या घडामोडींमुळे जागतिक बाजारपेठेत कच्च्या तेलाच्या किमती आणि पुरवठ्यावर मोठा परिणाम होण्याची शक्यता वर्तवली जात आहे.

यूरेनियमसाठी अमेरिकन सैन्य इराणमध्ये शिरणार? 
केवळ तेलच नाही, तर इराणला अण्वस्त्र निर्मितीपासून रोखण्यासाठी ट्रम्प प्रशासन एका 'हाय-रिस्क' मिशनवर विचार करत आहे. अमेरिकन अधिकाऱ्यांनुसार, इराणमधील १००० पाउंड यूरेनियम हस्तगत करण्यासाठी लष्करी कारवाईचा प्रस्ताव ट्रम्प यांच्यासमोर आहे.