काऊंटडाऊन सुरू! शुभांशू शुक्लांसह अंतराळवीर स्पेसक्राफ्टमध्ये बसले, ४१ वर्षांनी दुसरा भारतीय...

NASA Ax-4 Mission: अ‍ॅक्सियम मिशन ४ अंतर्गत आंतरराष्ट्रीय अंतराळ स्थानकात हे अंतराळवीर जाणार आहेत. फ्लोरिडा येथील नासाच्या केनेडी स्पेस सेंटरवर सर्व तयारी पूर्ण झाली असून चारही अंतराळवीर ड्रॅगन कॅप्सुलमध्ये बसले आहेत.

एक दोनदा नाही तर तब्बल सहावेळा खराब हवामानामुळे पुढे ढकलण्यात आलेली नासाची अंतराळ मोहिम आज सुरु होणार आहे. जवळपास ४१ वर्षांनंतर भारतीय अंतराळवीर अंतराळात जाणार आहे. १४ दिवसांच्या या मोहिमेत वेगवेगळे प्रयोग केले जाणार आहेत. यात इस्रोचा देखील समावेश आहे. 

शुभांशू शुक्लांसोबत अन्य तीन अंतराळवीर देखील असणार आहेत. भारतीय वेळेनुसार दुपारी १२ वाजता या अंतराळवीरांना घेऊन रॉकेट झेपावणार आहे.  अ‍ॅक्सियम मिशन ४ अंतर्गत आंतरराष्ट्रीय अंतराळ स्थानकात हे अंतराळवीर जाणार आहेत. फ्लोरिडा येथील नासाच्या केनेडी स्पेस सेंटरवर सर्व तयारी पूर्ण झाली असून चारही अंतराळवीर ड्रॅगन कॅप्सुलमध्ये बसले आहेत. सर्व चेक पूर्ण झाले असून स्पेसएक्सच्या फाल्कन-९ रॉकेट उड्डाणासाठी सज्ज झाले आहे. हा प्रवास सुमारे साडे अठ्ठावीस तासांचा आहे. २६ जून रोजी दुपारी साडे चार वाजता हे यान  आंतरराष्ट्रीय अंतराळ स्थानकावर पोहोचणार आहे. 

या मोहिमेचे नेतृत्व कमांडर पॅगी व्हिटसन या करीत असून, अंतराळवीर शुक्ला पायलट असतील. हंगेरीचा अंतराळीवर टिबोर कपू आणि पोलंडचा स्लोव्होज उझ्नान्स्की विस्निव्हस्की तज्ज्ञ म्हणून सोबत असतील. 

सहा वेळा प्रक्षेपण लांबले

या मोहिमेचे पहिले प्रक्षेपण २९ मे रोजी होणार होते. परंतु, स्पेसएक्सच्या फाल्कन रॉकेटच्या बूस्टरमध्ये द्रव ऑक्सिजन गळतीमुळे प्रक्षेपण लांबले. त्यानंतर विविध कारणांमुळे हे प्रक्षेपण लांबत होते. फ्लोरिडातील ‘नासा’च्या केनेडी अंतराळ केंद्रावरून हे यान प्रक्षेपित केले जाईल. या मोहिमेसाठी भारताने ५५० कोटी खर्च केले आहेत.

LIVE: @Axiom_Space's #Ax4 mission, with crew from four different countries, is about to launch to the @Space_Station! Liftoff from @NASAKennedy is targeted for 2:31am ET (0631 UTC). https://t.co/yBgO8bxb6Z

— NASA (@NASA) June 25, 2025

Ax-4 मिशन काय आहे?
Ax-4 मोहिमेचा मुख्य उद्देश अवकाशात विविध वैज्ञानिक प्रयोग आणि तांत्रिक चाचण्या करणे हा आहे. या अभियानांतर्गत अनेक मोठी कामे केली जाणार आहेत. तेथे सर्व शास्त्रज्ञ सूक्ष्म गुरुत्वाकर्षणातील जैविक आणि भौतिक विज्ञानाशी संबंधित प्रयोग करतील. यासोबतच तेथे तांत्रिक चाचण्याही घेण्यात येणार आहेत. या काळात नवीन अवकाश तंत्रज्ञान आणि उपकरणांची चाचणी घेतली जाईल. या मोहिमेअंतर्गत पृथ्वीवरील लोकांना अंतराळ विज्ञान आणि संशोधनाबाबत जागरूक केले जाईल.