इराणला आधीच लागली होती हल्ल्याची कुणकुण? अणुकेंद्रांच्या सॅटेलाईट फोटोमधून अशी माहिती आली समोर

America Attack on Iran : अमेरिकेने केलेल्या हल्ल्यात फारसं नुकसान झालं नसल्याचे सांगत इराणणे आपली सर्व अणुकेंद्र सुरक्षित असून, किरणोत्सारासारखा कुठला प्रकार घडला नसल्याचे म्हटले आहे. त्यामुळे आता अमेरिकेच्या संभाव्य हल्ल्याची कुणकुण इराणला आधीच लागली होती का, अशी चर्चा आता सुरू झाली आहे.

अमेरिकेने आज पहाटेच्या सुमारास इराणमधील तीन अणुकेंद्रांना लक्ष्य करत केलेल्या भीषण हल्ल्यानंतर जगभरात खळबळ उडाली आहे. तसेच आधीच तणावपूर्ण असलेली मध्य पूर्वेतील परिस्थिती आणखीनच चिघळली आहे. दरम्यान, इराणमधील फोर्डो, नतांज आणि इस्फहान येथे केलेल्या हल्ल्यात इराणच्या अणुकार्यक्रमाचं जबर नुकसान झाल्याचा दावा अमेरिकेने केला आहे. मात्र इराणने अमेरिकेचे सर्व दावे फेटाळून लावले आहेत. तसेच या हल्ल्यात फारसं नुकसान झालं नसल्याचे सांगत इराणणे आपली सर्व अणुकेंद्र सुरक्षित असून, किरणोत्सारासारखा कुठला प्रकार घडला नसल्याचे म्हटले आहे. त्यामुळे आता अमेरिकेच्या संभाव्य हल्ल्याची कुणकुण इराणला आधीच लागली होती का, अशी चर्चा आता सुरू झाली आहे.

इराणवरील इस्राइलच्या सैनिकी कारवाई करण्याबाबतचा निर्णय घेण्यासाठी दोन आठवड्यांची वेळ घेऊ, असे डोनाल्ड ट्रम्प यांनी म्हटले होते. मात्र अमेरिकेने रविवारी पहाटेच इराणवर हल्ला करत अनेकांना धक्का दिला आहे. मात्र आम्ही आमची अणुकेंद्र आदीच रिकामी केली होती, असा दावा इराणने केला आहे. त्यामुळे आता इराणचा हा दावा कितपत खरा आहे, हा प्रश्न उपस्थित होत आहे.

अमेरिकेने रविवारी पहाटेच्या सुमारास केलेल्या हल्ल्यापूर्वी १९ आणि २० जून रोजी इराणमधील फोर्टो अणुकेंद्राजवळच्या परिसराचे घेतलेले काही सॅटेलाईट फोटो समोर आले आहेत. त्यामध्ये या अणुकेंद्राजवळ ट्रक आणि इतर वाहनांची वर्दळ दिसून येत आहे.

१९ जून रोजी भूमिगत लष्करी केंद्राच्या बोगद्यातील प्रवेशद्वाराकडे जाणाऱ्या रस्त्यावर १६ कार्गो ट्रक उभे असल्याचे दिसत आहे. तर २० जून रोजी घेतलेल्या फोटोमध्ये यापैकी बहुतांश ट्रक एक किमी उत्तर पश्चिमेकडे असलेल्या रस्त्यावर नेण्यात आले होते. मुख्य परिसराच्या एंट्री पॉईंटजवळ ट्रक आणि काही बुलडोझर दिसत होते. एक ट्रक तर या भूमिगत केंद्राच्या प्रवेशद्वाराशेजारी उभा असलेला दिसत आहे.