'ऑपरेशन सिंदूर'अंतर्गत पाकमधील 'या' ९ ठिकाणी एअर स्ट्राईक; २६/११, पुलवामाशी होता संबंध

भारताकडून पाकिस्तान आणि पाकव्याप्त काश्मीरमधील ७ शहरांमधील ९ दहशतवादी अड्ड्यांवर हल्ला करण्यात आला आहे.

Operation Sindoor: मध्यरात्री पाकिस्तानात भारताने ऑपरेशन सिंदूर राबवून पहलगाम हल्ल्याचा सूड घेतला आहे. दहशतवादाविरुद्धच्या कारवाईत भारताने दहशतवाद्यांचे तळ उद्ध्वस्त केले आहे. राफेल विमानांनी केलेल्या हवाई हल्ल्यात जैश-ए-मोहम्मदच्या 'जैश-सुभानल्लाह'च्या लपण्याच्या ठिकाणांना आणि लष्करच्या 'मरकझ-ए-तोयबा'च्या तळांना लक्ष्य करण्यात आले. या एअरस्ट्राईकमध्ये पाकिस्तान आणि पाकव्याप्त काश्मिरमधील नऊ ठिकाणांना लक्ष्य करण्यात आले आहे.

पहलगाम हल्ल्यानंतर भारताने पाकिस्तानच्या दहशतवादी संघटनांना प्रत्युत्तर दिले आहे. मंगळवारी मध्यरात्रीनंतर भारतीय हवाई दलाने पाकिस्तान आणि पाकव्याप्त काश्मीरमध्ये हवाई हल्ला केला. या हल्ल्यात ७ शहरांमधील ९ दहशतवादी अड्ड्यांवर हल्ला करण्यात आला आहे. यामध्ये १०० हून अधिक दहशतवादी मारले गेल्याचे म्हटलं जात आहे. भारताने २४ क्षेपणास्त्रे डागल्याचे पाकिस्तानकडून सांगण्यात आले आहे. भारताकडून लक्ष्य करण्यात आलेली नऊ ठिकाणे ही जैश-ए-मोहम्मद, हिज्बुल मुजाहिदीन, लष्कर-ए-तोयबा या दहशतवादी संघटनांचे तळ होते.

भारतीय सशस्त्र दलांनी लक्ष्य केलेली नऊ ठिकाणे -

१. मरकज सुभानल्लाह - जैश-ए-मोहम्मद (बहावलपूर, पंजाब, पाकिस्तान) हे मरकज जैश-ए-मोहम्मदचे ऑपरेशनल मुख्यालय म्हणून काम करते. १४ फेब्रुवारी २०१९ रोजी झालेल्या  पुलवामा दहशतवादी हल्ल्याची योजना इथून आखली गेली होती. पुलवामा हल्ल्यातील दहशतवाद्यांना या कॅम्पमध्ये प्रशिक्षण देण्यात आले होते.

२. मरकज तैयबा - २००० मध्ये सुरु झालेले मरकज तैयबा हे 'अल्मा मेटर'आणि लष्करेचे सर्वात महत्वाचे प्रशिक्षण केंद्र आहे. हे नांगल सहदान, मुरीदके, शेखुपुरा, पंजाब, पाकिस्तान येथे आहे.

३. सरजल/तेहरा कलान - जैश-ए-मोहम्मद (शकरगढ, नारोवाल, पंजाब, पाकिस्तान) हे जम्मू-काश्मीरमध्ये दहशतवाद्यांच्या घुसखोरीसाठी जैश-ए-मोहम्मदचे मुख्य प्रक्षेपण केंद्र आहे. हे केंद्र सरजल परिसरातील तेहरा कलान गावातील प्राथमिक आरोग्य केंद्राच्या आवारात आहे जेणेकरून त्याचा खरा उद्देश लपून राहील.

Graphic representation of the targets taken by the Indian Armed Forces under #OperationSindoor in Pakistan and PoJK https://t.co/cEasBn51U9pic.twitter.com/HMONRGQxWW

— ANI (@ANI) May 7, 2025

४. मेहमूना जोया फॅसिलिटी- हिजबुल मुजाहिदीनचा (एचएम) मेहमूना जोया तळ हा पाकिस्तानमधील सियालकोट जिल्ह्यातील हेड मराला भागात कोटली भुट्टा सरकारी रुग्णालयाजवळ आहे. दहशतवाद्यांना पाठिंबा देणाऱ्या आयएसआयने दहशतवाद्यांसाठीच्या पायाभूत सुविधा लपविण्यासाठी आंतरराष्ट्रीय सीमा आणि नियंत्रण रेषेवर सरकारी इमारतींमध्ये अशा केंद्रांची स्थापना केली आहे.

५. मरकज अहले हदीस बरनाला - (लष्कर-ए-तोयबा भिंबर जिल्हा, पीओके) मरकज अहले हदीस, बरनाला हे पीओकेमधील लष्कर-ए-तोयबाच्या महत्त्वाच्या मरकजपैकी एक आहे. पूंछ - राजौरी - रियासी सेक्टरमध्ये लष्कर-ए-तोयबाच्या दहशतवाद्यांना घुसखोरी करण्यासाठी आणि शस्त्रास्त्रे/दारूगोळा पुरवण्यासाठी याचा वापर केला जातो. मरकझ बर्नाला शहराच्या बाहेर कोटे जमेल रस्त्यावर आहे.

६. मरकज अब्बास- जैश-ए-मोहम्मदचे मरकज सैदना हजरत अब्बास बिन अब्दुल मुतालिब (मरकझ अब्बास) हे मोहल्ला रोली धारा बायपास रोड, कोटली येथे आहे. हे कोटली मिलिटरी कॅम्पच्या आग्नेयेस दोन किमी आहे.

७. मस्कर राहिल शाहिद - (हिज्बुल-मुजाहिदीन कोटली, पीओजेके) कोटली जिल्ह्यातील माहुली पुली (मीरपूर-कोटली रस्त्यावरील माहुली नाल्यावरील पूल) पासून सुमारे २.५ किमी अंतरावर असलेले मस्कर राहिल शाहिद हे हिज्बुल मुजाहिदीन (एचएम) च्या सर्वात जुन्या ठिकाणांपैकी एक आहे. हा कॅम्प डोंगराळ भागात आहे आणि त्यात बॅरेक, शस्त्रे आणि दारूगोळा ठेवण्यासाठी वापरल्या जाणाऱ्या चार खोल्या, कार्यालय आणि दहशतवाद्यांचे निवासस्थान आहे.

८. शवाई नालाह कॅम्प - हे एलईटीच्या सर्वात महत्त्वाच्या कॅम्पपैकी एक आहे आणि ते लष्कर-ए-तोयबा कॅडरची भरती, नोंदणी आणि प्रशिक्षण यासाठी वापरले जाते. हे कॅम्प २००० च्या सुरुवातीपासून सुरु आहे.

९. मरकज सय्यदना बिलाल - मुझफ्फराबाद येथील लाल किल्ल्यासमोरील पीओकेमध्ये जैश-ए-मोहम्मदचे मुख्य केंद्र आहे. जम्मू-काश्मीरमध्ये प्रवेश करण्यापूर्वी या ठिकाणाचा वापर जेईएमच्या दहशतवाद्यांसाठी ट्रान्झिट कॅम्प म्हणून केला जातो. कोणत्याही वेळी या ठिकाणी ५०-१०० दहशतवादी राहतात. जेईएमचे ऑपरेशनल कमांडर आणि पीओजेकेचे जेईएम प्रमुख मुफ्ती असगर खान काश्मिरा या ठिकाणाचा प्रमुख आहे. अब्दुल्ला जेहादी उर्फ ​​अब्दुल्ला काश्मिरी आणि आशिक नेंगरू देखील या केंद्रातून काम करतो. पाकिस्तानी सैन्याच्या स्पेशल सर्व्हिस ग्रुप (एसएसजी) चे कमांडो देखील या ठिकाणी जेईएमच्या दहशतवाद्यांना प्रशिक्षण देतात.