पाकिस्ताननंतर इराणचे हवाई क्षेत्रही बंद; विमानांना सौदीच्या आकाशातून जावे लागणार 

Israel vs Iran: इस्रायलने इराणवर हल्ला केल्यानंतर इराणी हवाई क्षेत्र बंद केल्याने भारतीय विमानांसाठी आणखी एक नवीन समस्या निर्माण झाली आहे.

पहलगाम हल्ल्यानंतर पाकिस्तानने भारतासाठी आपले हवाई क्षेत्र बंद केले आहे. यामुळे भारतीय विमानांना गुजरातवरून समुद्रातून वळसा घालून इराणच्या हवाई क्षेत्रातून जावे लागत होते. परंतू, आता इस्रायलनेइराणवर हल्ले केल्याने इराणने आपले हवाई क्षेत्र देखील बंद करून टाकले आहे. यामुळे आंतरराष्ट्रीय विमानांना आपला मार्ग बदलावा लागला आहे. 

इस्रायलने इराणवर हल्ला केल्यानंतर इराणी हवाई क्षेत्र बंद केल्याने भारतीय विमानांसाठी आणखी एक नवीन समस्या निर्माण झाली आहे. दिल्लीहून इंग्लंड, अमेरिका आणि इतर युरोपीय देशांना जाणाऱ्या विमानांना आता लांबचा मार्ग पत्करावा लागत आहे. भारतीय तसेच भारताकडे ये-जा करणाऱ्या परदेशी विमानांना भारतात येण्यासाठी आता सौदी अरेबियाच्या आकाशातून जावे लागणार आहे. 

इस्रायलने इराणवर हल्ला केल्यानंतर इराणी हवाई क्षेत्र बंद झाल्यामुळे शुक्रवारी त्यांच्या लांब पल्ल्याच्या १६ उड्डाणे वळवावी लागल्याचे एअर इंडियाने म्हटले आहे. प्रवाशांना त्यांच्या गंतव्यस्थानावर नेण्यासाठी विमानांची व्यवस्था केली जात असल्याचे एअर इंडियाने म्हटले आहे. लंडन हीथ्रो-मुंबई विमानसेवा व्हिएन्ना, न्यू यॉर्क-दिल्ली ते शारजाह आणि न्यू यॉर्क-मुंबई ते जेद्दाह अशी वळवण्यात आली. लंडन हीथ्रो-दिल्ली विमानाला मुंबईत उतरविण्यात आले. 

युरोपिय देशांचा मार्गाचे अंतर हे सुमारे ७००० किमी पेक्षा जास्त आहे, त्यानुसार विमानात इंधन भरले जाते. परंतू, मार्ग बदलावा लागल्याने इंधन कमी झाले व अनेक विमानांना मुंबईतच उतरविण्यात आले आहे. तिथून या प्रवाशांना दिल्लीत आणण्यासाठी वेगळी विमाने तयार ठेवण्यात आली होती. दिल्लीहून वॉशिंग्टनला जाणारे एअर इंडियाचे विमान क्रमांक AI-103 दिल्लीला परत येत आहे. इंडिगोने देखील प्रवासाचा वेळ वाढणार असल्याची सूचना केली आहे.