मास्क न वापरणाऱ्यांवर कारवाई करण्याचे अधिकार शासनाने नगर परिषदेला दिले आहेत. त्याप्रमाणे नगर परिषद वर्षभरापासून कारवाईचे करण्याचे काम करीत आहे. याकरिता पोलीस विभाग त्यांना मदतही करीत आहे. अजूनही जिल्ह्यात कोरोनाचे प्रमाण कमी झाले नाही. तरीही काही नागरिक बिनधाास्तपणे विनामास्क रस्त्याने फिरताना आढळून येत आहेत.
२१ मार्च २०२० पासून जिल्हाधिकारी रुचेश जयवंशी यांच्या आदेशानुसार मुख्याधिकारी डाॅ. अजय कुरवाडे यांच्या मार्गदर्शनाखाली नगर परिषद व पोलीस विभागाचे संयुक्तिक पथक स्थापन करण्यात आले आहे. फेब्रुवारी २०२१ पासून मोठ्या प्रमाणात कोरोनाचे रुग्ण आढळून येत आहेत. कोरोनाचा प्रादुर्भाव वाढला जाऊ नये म्हणून जिल्हा प्रशासनाला २४ फेब्रुवारीपासून संचारबंदी लावावी लागली होती. त्यानंतर १ ते ७ मार्च दरम्यान टाळेबंदीही करण्यात आली होती. २०२१ मध्ये १४९ जणांवर कारवाई करण्यात आली आहे.
बॉक्स
२०२१ मध्ये १४९ जणांना लावला दंड
२०२१ मध्ये १४९ विनामास्क फिरणाऱ्यांवर कारवाई करण्यात आली आहे. त्यांच्याकडून दंडापोटी ४७ हजार ६०० रुपये वसूल करण्यात आले. कोरोनाचा प्रादुर्भाव वाढत असतानाही बिनधास्तपणे नागरिक फिरताना दिसून येत आहेत. नियमांचे उल्लंघन होऊ नये म्हणून नगरपरिषद कारवाई करीत आहे.
बॉक्स
दोन मंगल कार्यालयांना एक लाख रुपयांचा दंड
गत दोन महिन्यांपासून कोरोनाचे रुग्ण मोठ्या प्रमाणात वाढू लागले आहेत. असे असताना शहरातील दोन मंगल कार्यालयाने जिल्हा प्रशासनाच्या आदेशाचे उल्लंघन केल्यामुळे नगर परिषद पथकाने त्यांच्यावर कारवाई केली. त्यांच्याकडून दंडापोटी प्रत्येकी ५० हजार रुपयांप्रमाणे १ लाख वसूल केले आहेत.
बॉक्स
जिल्ह्यात मागील दोन महिन्यांपासून कोरोनाचे रुग्ण झपाट्याने वाढत आहेत. जिल्हाधिकारी यांच्या आदेशानुसार नगर परिषद विनामास्क फिरणाऱ्यांवर तसेच जिल्हा प्रशासनाच्या नियमांचे उल्लंघन करणाऱ्यांवर कारवाई करीत आहे. यात काही अडचण आली तर जिल्हा पोलीस अधीक्षक राकेश कलासागर यांच्या मार्गदर्शनाखाली पोलीस विभागही नगर परिषद पथकाला सहकार्य करीत आहे.
-विद्यासागर श्रीमनवार, पोलीस निरीक्षक, शहर वाहतूक शाखा