हिंगोली: जिल्ह्यात कोरोनाचे प्रमाण वाढू लागल्यामुळे जिल्हा प्रशासनाच्या वतीने विनामास्क फिरणाऱ्यांना दंड लावला जात आहे. मंगळवारी नगर परिषद व पोलिसांनी केलेल्या कार्यवाहीत ११ जणांकडून ७२०० रुपये दंड वसूल करण्यात आला आहे. यामध्ये एक लॉज व एक स्वीट मार्टचा समावेश आहे.
२३ फेब्रुवारी रोजी सकाळी अकरा ते दुपारी साडेचार वाजे दरम्यान शहरातील इंदिरा चौक, गांधी चौक या भागात पथकाने विनामास्क फिरणाऱ्यांवर कार्यवाही करत दंड लावला. कोरोनाचे रुग्ण वाढत असूृन नागरिकांनी विनामास्क फिरु नये, नागरिकांनी सॅनिटायझरचा वापर करावा, असे आवाहन मुख्याधिकारी डॉ. अजय कुरवाडे यांनी केले आहे. मोहिमे दरम्यान विनामास्क दंड आकारणी २२०० रुपये वसूल करण्यात आले आहेत. याचबरोबर सॅनिटायरचा वापर न करणे, स्वच्छता न ठेवणे व नोकरदारांना मास्कचा पुरवठा न करणे या कारणावरुन शहरातील साई लॉजला २ हजार तर अंबिका स्वीटमार्टला ३ हजार रुपयांचा दंड ठोठावला आहे. सदर पथकामार्फत दैनंदिन तपासणी सुरुच आहे.२३ रोजी विविध आस्थापना,लॉज, मंगल कार्यालय, खाजगी कार्यालय, दुकाने असे २९ आस्थापनांची तपासणी करण्यात आली. नगर परिषदेने नेमलेल्या पथकामध्ये मुख्याधकारी डॉ. अजय कुरवाडे यांच्या मार्गदर्शनाखाली पथकप्रमुख डी. प. शिंदे, स्वच्छता निरीक्षक बाळू बांगर, बी. के. राठोड, पंडित मस्के, प्रवीण चव्हाण, नागेश नरवाडे, अमर ठाकूर, पवन खरात, सुषमा भाटेगावकर, विकास गवळी, बळीराम शिंदे यांचा समावेश होता. दिवसभर पथकाने कार्यवाही केल्यानंतर सायंकाळी साडेपाच वाजेनंतर मात्र विनामास्क फिरणाऱ्यांची संख्य मात्र पाहण्यासारखी होती.