Summer Tips: उन्हाळ्यात माठातील पाणी राहील रेफ्रिजरेटरसारखं थंड, फॉलो करा 'या' सोप्या टीप्स!

उन्हाळ्याचा कडाका वाढू लागला आहे आणि या वाढत्या तापमानासोबतच थंड पाणी पिण्याची ओढही वाढली आहे. थंड पाण्यासाठी अनेकजण रेफ्रिजरेटरचा वापर करतात, पण फ्रिजमधील पाणी घशासाठी हानिकारक ठरू शकते. दुसरीकडे, बॅचलर्स किंवा नैसर्गिक जीवनशैली आवडणारे लोक आजही मातीच्या माठालाच पसंती देतात. मात्र, अनेकदा 'माठातील पाणी फ्रिजसारखं थंड होत नाही' अशी तक्रार ऐकायला मिळते. जर तुम्हालाही ही समस्या जाणवत असेल, तर खालील काही सोप्या युक्त्या वापरून तुम्ही तुमच्या माठाला नॅचरल फ्रिज बनवू शकता.

फॉलो करा 'या' सोप्या टीप्स!

१) ओल्या सुती कापडाचा वापर

माठातील पाणी थंड ठेवण्यासाठी ही सर्वात जुनी आणि प्रभावी पद्धत आहे. एक जाड सुती कापड पाण्यात पूर्णपणे भिजवून ते माठाभोवती गुंडाळून ठेवा. जसे या कापडातील पाण्याचे बाष्पीभवन होईल, तशी माठातील उष्णता शोषली जाईल आणि पाणी गार होईल. लक्षात ठेवा, हे कापड कोरडे पडू देऊ नका, त्यावर अधूनमधून पाण्याचा शिडकावा करत राहा.

२) वाळूचा थर देईल थंडावा

एका मोठ्या परळीत किंवा रुंद भांड्यात वाळू भरा आणि ती पाण्याने चांगली ओली करा. आता तुमचा माठ या ओल्या वाळूवर ठेवा. वाळूतील ओलावा माठाच्या भिंतींना थंड ठेवतो, ज्यामुळे भर उन्हातही माठातील पाणी बर्फासारखे थंड लागते.

३) हवेचा संचार असलेली जागा निवडा

माठ कधीही बंद खोलीत किंवा कोपऱ्यात ठेवू नका. तो अशा ठिकाणी ठेवा जिथे हवेची ये-जा (Ventilation) चांगली असेल, जसे की खिडकीजवळ. हवेच्या संपर्कात आल्यामुळे बाष्पीभवनाचा वेग वाढतो आणि पाणी लवकर थंड होते.

४) जुना माठ बदलण्याची वेळ आलीय का?

जर तुमचा माठ खूप जुना झाला असेल, तर त्यावरील सूक्ष्म छिद्रे क्षार किंवा धुळीमुळे बंद होतात. अशा वेळी नवीन माठ खरेदी करणे उत्तम ठरेल. माठ घेताना तो नक्षीकाम केलेला किंवा पॉलिश केलेला नसावा, कारण अशा माठात हवेचा संचार नीट होत नाही. तसेच, माठ बाहेरून धुताना कधीही साबण वापरू नका, फक्त साध्या पाण्याने आणि ब्रशने स्वच्छ करा.