Corona Virus : बापरे! कोरोनाच्या नव्या व्हेरिएंटने पुन्हा भरवली धडकी, XFG रोगप्रतिकारक शक्तीला देतोय चकवा

Corona Virus : भारतात कोरोनाचा एक नवीन व्हेरिएंट देखील समोर आला असून XFG असं त्याचं नाव आहे.

भारतात कोरोनाचे रुग्ण सातत्याने वेगाने वाढत आहेत, गेल्या महिन्यापासून वाढू लागलेल्या रुग्णांची संख्या आता ६४९१ वर पोहोचली आहे. चिंतेची बाब म्हणजे भारतात कोरोनाचा एक नवीन व्हेरिएंट देखील समोर आला असून XFG असं त्याचं नाव आहे. हा नवीन व्हेरिएंट माणसांच्या सर्वात मजबूत रोगप्रतिकारक शक्तीलाही चकवा देण्यास सक्षम आहे. सध्या या नवीन व्हेरिएंटचे १६३ रुग्ण नोंदवले गेले आहेत.  

देशात २२ मे रोजी फक्त २५७ सक्रिय रुग्ण होते, तर ९ जून रोजी हा आकडा ६४९१ पर्यंत वाढला आहे. गेल्या २४ तासांबद्दल बोलायचं झालं तर देशात ३५८ नवीन कोरोना रुग्ण आढळले आहेत, येथेही ६२४ लोक या संसर्गातून बरे झाले आहेत. द लॅन्सेट जर्नलमध्ये एक रिपोर्ट प्रकाशित झाला आहे ज्यामध्ये असं दिसून आलं आहे की कोरोनाचा नवीन व्हेरिएंट XFG वेगाने पसरतो. 

XFG व्हेरिएंटमध्ये एकूण चार म्यूटेशन 

रिपोर्टनुसार, XFG व्हेरिएंटमध्ये एकूण चार म्यूटेशन आहेत. म्हणूनच तो इतर व्हेरिएंटपेक्षा वेगाने पसरत आहे. असं सांगितलं जात आहे की या कोरोना व्हेरिएंटचा  पहिला रुग्ण कॅनडामध्ये सापडला होता, परंतु त्याचा संसर्ग इतर देशांमध्ये पसरला आहे आणि आता भारतातही आहे. डॉक्टरांनी मात्र हा नवीन व्हेरिएंट फारसा चिंताजनक नाही, गंभीर लक्षणं दिसत नाहीत असं म्हटलं आहे. 

देशात NB.1.8.1 आणि LF.7 चे रुग्ण 

सध्या देशात NB.1.8.1 आणि LF.7 चे रुग्ण देखील समोर येत आहेत. जागतिक आरोग्य संघटनेने NB.1.8.1 आणि LF.7 दोन्ही व्हेरिएंटला 'निरीक्षणाखालील व्हेरिएंट' म्हणून ठेवलं आहे. याचा अर्थ असा की, सध्या या दोन्ही व्हेरिएंटवर बारकाईने लक्ष ठेवलं जात आहे आणि ते अद्याप जास्त त्रासाचं कारण बनलेलं नाही.

एका व्यक्तीकडून दुसऱ्या व्यक्तीकडे सहजपणे संक्रमित 

द हिंदूमधील एका रिपोर्टनुसार, चीन आणि आशियातील इतर भागांमध्ये कोरोना रुग्णांमध्ये अलिकडच्या काळात झालेल्या वाढीमागे हा व्हेरिएंट असल्याचं मानलं जातं. हे दोन्ही व्हेरिएंट कोरोना व्हायरसच्या स्पाइक प्रोटीनमध्ये अनेक बदल करतात, ज्यामुळे ते एका व्यक्तीकडून दुसऱ्या व्यक्तीकडे सहजपणे संक्रमित होतं. यामुळे लोकांमध्ये भीतीचे वातावरण निर्माण झाले आहे.