गोंदिया : कोरोना प्रादुर्भावाच्या काळात आपल्या फुफ्फुसाचे आरोग्य व्यवस्थित आहे का, याची चाचणी घरातल्या घरात सहा मिनिटे चालण्याची चाचणी (सिक्स मिनिट वॉक टेस्ट) करण्यासाठी आरोग्य विभागाने भर दिला आहे. त्याबाबत नागरिकांचे प्रबोधन करण्याचे काम आरोग्य विभागाने सुरू केले आहे. राज्यातील आरोग्य यंत्रणेच्या सूचनेनुसार जिल्हा आरोग्य यंत्रणेला सहा मिनिटे चालण्याच्या चाचणीबाबत अधिक जागरूकता केली जात आहे. यामुळे नागरिकांना रक्तातील ऑक्सिजनची कमतरता लक्षात येईल, जेणेकरून गरजू रुग्णाला वेळेवर रुग्णालयात दाखल करणे शक्य होणार आहे. कोरोना विषाणूचा प्रादुर्भाव एवढ्या मोठ्या प्रमाणात वाढला की, रुग्णालयात रुग्णांना जागा मिळत नसल्याने आता रुग्ण वाहून नेणाऱ्या रुग्णवाहिकतेच रुग्णांना प्राण सोडावा लागत आहे. या भीषण परिस्थतीत घरच्या घरी काळजी घेणे आवश्यक आहे.
.........
बॉक्स
कुणी करायची ही टेस्ट?
ताप, सर्दी, खोकला अथवा कोरोनाची लक्षणे जाणवणारी व्यक्ती तसेच होम आयसोलेशनमध्ये असणारे रुग्ण ही चाचणी करू शकतात.
......
...अशी करावी चाचणी
ही चाचणी करण्यापूर्वी बोटाला पल्स ऑक्सिमीटर लावून त्यावरील ऑक्सिजनची नोंद करावी. त्यानंतर ऑक्सिमीटर तसाच बोटात ठेवून घरातल्या घरात सहा मिनिटे चालावे (पायऱ्यांवर चालू नये). यादरम्यान अतिवेगात किंवा हळूहळू चालू नये तर मध्यम चालावे. सहा मिनिटे चालून झाल्यानंतर पुन्हा ऑक्सिजनच्या पातळीची नोंद घ्यावी.
............
....तर घ्या काळजी
सहा मिनिटे चालल्यानंतर ऑक्सिजनची पातळी ९३ टक्क्यांपेक्षा कमी होत असेल, चालणे सुरू करण्यापूर्वी जी पातळी होती त्यापेक्षा ९३ टक्क्यांपेक्षा जास्त घट होत असेल किंवा सहा मिनिटे चालल्यानंतर दम, धाप लागल्यासारखे वाटत असेल तर त्या व्यक्तिला ऑक्सिजन अपुरा पडतो आहे, असे समजून त्याला रुग्णालयात दाखल करावे.
.....
सहा मिनिटे चालूनही ऑक्सिजनचे प्रमाण कमी झाले नाही तर तर तब्येत उत्तम आहे, असे समजावे. समजा ऑक्सिजन एक ते दोन टक्क्यांनी कमी होत असेल तर काळजी न करता दिवसातून पुन्हा दोन वेळा अशीच चाचणी करावी, जेणेकरून काही बदल होतो का ते लक्षात येईल.
- डाॅ. सुर्वणा हुबेकर, निवासी वैद्यकीय अधिकारी, गोंदिया.
.......
ज्यांना बसल्याजागीच धाप, दम लागतो, त्यांनी ही चाचणी करु नये, ६० वर्षांहून अधिक वयाच्या व्यक्ती ६ मिनिटांऐवजी ३ मिनिटे चालून ही चाचणी करू शकतात. आरोग्याविषयी जनजागृतीसाठी ‘सिक्स मिनिट वॉक टेस्ट’ करणे आवश्यक आहे.
- डॉ. अविनाश येळणे, वैद्यकीय महाविद्यालय, गोंदिया.
......
फुफ्फुसाच्या आरोग्याविषयी जागरूकतेसाठी ‘सिक्स मिनिट वॉक टेस्ट’ करणे आवश्यक आहे. यासाठी पल्स ऑक्सीमीटर घरात असणे आवश्यक आहे. ते असल्यास सहजरित्या ती चाचणी करता येणार आहे.
- डॉ. अरविंद खोब्रागडे, अधीक्षक, ग्रामीण रुग्णालय, आमगाव.