नरेश रहिले
गोंदिया : खेळण्या-बाळगण्याच्या वयात प्रेमाची भाषा समजणारे मुले-मुली मोठ्या वयात कोणत्या स्तराला जातात याचेच एक उदाहरण म्हणजे गोंदियातील एका वकील महिलेचे प्रकरण आहे. अगदी बालवयापासून तर प्राथमिक शिक्षण ज्या मुलासोबत घेतले आज तो दोन मुलींचा पिता असतानाही त्याला नवरा बनविण्याची मनोमन इच्छा वकील महिलेने ठेवली. त्याला नवरा बनविण्यासाठी चक्क त्याच्या बायकोचा ‘गेम’ करण्याचा प्लान तिने तयार केला. चार लाखांत तिची सुपारी दिली. परंतु ज्याला सुपारी दिली त्याला घर दाखविले खून करायचा आहे, ती व्यक्ती त्याला निश्चित माहीत असावी म्हणून सुपारी घेणाऱ्यासोबत सोनल शर्माचे घर गाठले.
सोनल शर्माचे पती आशिष शर्मा लहान असताना त्यांच्यासोबत कॉन्व्हेंटपासून तर प्राथमिक शिक्षण सोबत घेणाऱ्या वकील महिलेचे प्रेम शर्मांवर जडले. परंतु प्राथमिक शिक्षणानंतर त्या दोघांचाही संपर्क झाला नाही. वयात आल्यावर दोघांचेही वेगवेगळे लग्न झाले. आशिष शर्माला दोन मुली, तर आरोपी वकील महिलेला एक मुलगी आहे. परंतु वकील महिला ही आशिष शर्मावर प्रेम करीत असल्याने त्याची पत्नी सोनल हिचा काटा काढण्याचा गेम वकील महिलेने तयार केला. तीन महिन्यांपूर्वी चांदपूरला जाण्यासाठी भाड्याचे वाहन घेतले त्या भाड्याच्या वाहनाचा चालक सुरज केशव रावते (५०, रा. टी.बी. टोली), गोंदिया याला तिने सुपारी घेण्यासाठी तयार केले. आपल्या घरातील एक समस्या दूर करण्यासाठी सुरजने वकील महिलेला विनवणी केली होती. त्या समस्येच्या निवारणाच्या बदल्यात वकील महिलेने सोनलची सुपारी दिली होती. परंतु त्याने सुपारी घेण्यास नकार दिल्याने त्याला चार लाखांचे आमिष दिले. पैशाच्या लोभापायी सुरज रावते याने सोनलचा खून करण्याची तयारी दर्शविली. सोनलची ओळख व तिचा घर दाखविण्यासाठी वकील महिला आरोपी सुरजच्या दुचाकीवर बसून तिच्या गणेशनगर येथील घरापर्यंत गेली. घराच्या काही अंतरावर थांबून वकील महिलेने सुरजला कुरिअर बॉय म्हणून फोन करण्यास सांगितले. कुरिअरचे पार्सल घेण्यासाठी आलेल्या सोनलवर चाकूने वार करण्याचा इशारा वकील महिलेने करताच आरोपी सुरजने तिच्यावर चाकूने हल्ला केला, अशी माहिती सुरज रावते यांनी पोलिसांना दिली आहे. बचपन का प्यार मेरा भूल नही जाना रे... हा सांगणारा प्रसंग लहानपणात झालेल्या प्रेमाला आता मिळविण्यासाठी एका निरपराध महिलेच्या जीवावर बेतत होता हे खरे.
सुरजला सोनलने धरून आपटले
सुरजने कमरेत खोचलेला चाकू काढून सोनलच्या गळ्यावर मारत असताना त्या चाकूला अडविण्यासाठी सोनलने हात पुढे केल्याने चाकू तिच्या हाताला लागला. यावेळी सोनलने आरोपी सुरजला उचलून जमिनीवर आपटताच वकील महिला पायीच धावत धावत घराबाहेर सुटली. आरोपी सुरजही तिथून आपली सुटका करून वाहन घेऊन पसार झाला.
मुलीचा टाहो अन् पाझरले सुरजचे मन
सोनलचा खून करण्यासाठी गेलेल्या सुरजने सोनलवर चाकूने हल्ला करताच त्याच्या पाठीवर असलेली बॅग सोनलची १३ वर्षांची मुलगी ओढत आरडाओरड करीत होती. माझ्या आईला मारू नका हा तिचा टाहो सुरजच्या कानी पडताच आपल्यालाही तीन मुली आहेत ही भावना त्याच्या मनात आली. त्याचेही मन कळवळू लागले आणि त्याने तिला सोडून पळ काढला.
पुरावा नष्ट करण्यासाठी जाळले कपडे
आरोपी सुरजने हल्ला केल्यानंतर या घटनेचे पुरावे नष्ट करण्यासाठी त्या दिवशी वापरलेले कपडे त्याने सूर्याटोला येथील बांधतलावावर जाऊन अंत्यसंस्कार करण्यात येणाऱ्या ठिकाणी ते रक्ताने माखलेले कपडे जाळले. त्यानंतर त्या कपड्याची राख बांधतलावात विसर्जन केली.