विधानसभा निवडणूक लढवणार : रोहित मोन्सेरात

महापौरपदासाठी अर्ज : उपमहापौरपदी आगशीकर

लोकमत न्यूज नेटवर्क, पणजी : आगामी विधानसभा निवडणूक आपण लढवणार आहे, अशी माहिती नगरसेवक तथा माजी महापौर रोहित मोन्सेरात यांनी दिली. महापौर निवडणुकीसाठी मोन्सेरात यांनी शुक्रवारी उमेदवारी अर्ज दाखल केला. त्यानंतर ते बोलत होते. त्यामुळे आपला महापौरपदाचा कार्यकाळ अल्पवधीचा असेल असेही त्यांनी स्पष्ट केले. उपमहापौरपदासाठी नगरसेवक वसंत आगशीकर यांनी अर्ज दाखल केला.

या दोन्ही पदांच्या निवडीसाठी सोमवारी, दि. ३० रोजी मनपा सभागृहात सकाळी ११ वाजता बैठक होईल. विरोधी गटाकडून अद्याप या पदांसाठी उमेदवारी अर्ज सादर झाले नसल्याने दोघांचीही बिनविरोध निवड होण्याची शक्यता आहे. मोन्सेरात म्हणाले, की मी पुढील वर्षी  होणारी विधानसभा निवडणूक लढवणार आहे. मंत्री बाबूश मोन्सेरात यांनी यापूर्वीच याची माहिती दिली आहे. मतदारसंघ कुठला असेल हे भाजप पक्ष ठरवेल. त्यामुळे माझा महापौरपदाचा कार्यकाळ अल्पावधी असेल. गेल्या पाच वर्षांत महापौर म्हणून शहरवासीयांना दिलेल्या आश्वासनांची पूर्तता केली आहे. उर्वरित कामेदेखील लवकरच पूर्ण करू, असे त्यांनी सांगितले.

मोन्सेरात म्हणाले की, 'सध्या शहरात स्मार्ट सिटीच्या बसेस कार्यरत असून, या सेवेचा विस्तार रायबंदरपर्यंत व्हावा यासाठी प्रयत्नशील आहे.

रस्ते खोदाईस आक्षेप

रोहित मोन्सेरात म्हणाले की, 'गॅस पाइपलाइनच्या कामासाठी शहरातील रस्ते पुन्हा एकदा फोडण्यास मनपाचा आक्षेप आहे. स्मार्ट सिटीची कामे जेव्हा सुरू होती, तेव्हाच गॅस पाइपलाइनचे काम करणे आवश्यक होते. मात्र, आता हॉटिमिक्स केलेले रस्ते पुन्हा फोडल्यास शहराची दुर्दशा होईल. लोकांची गैरसोय होईल. पावसाळाही नजीक येत आहे. त्यामुळे आता रस्ते खुदाई योग्य नाही असे त्यांनी स्पष्ट केले.