सोहमविरोधात आणखी तीन पीडिता देणार तक्रार; चार दिवसांची कोठडी, आणखी एक गुन्हा दाखल

सोहमच्या विरोधात आणखी एक गुन्हा नोंदविण्यात आला आहे.

लोकमत न्यूज नेटवर्क, पणजी : कुडचडे लैंगिक येथील अत्याचार प्रकरणातील मुख्य संशयित सोहम नाईक याला बाल न्यायालयाने शुक्रवारी चार दिवसांची पोलिस कोठडी सुनावली. सोहमची गुन्हा अन्वेषण शाखेकडून कसून चौकशी केली जात आहे. या प्रकरणात आणखी काही पीडितांकडून तक्रारी दाखल होतील अशी शक्यता आहे.

दरम्यान, सोहमच्या विरोधात आणखी एक गुन्हा नोंदविण्यात आला आहे. याप्रकरणी अल्पवयीन मुलीने तक्रार दिली आहे. आतापर्यंत त्याच्याविरोधात चार गुन्हे नोंद झाले आहेत. आणखी पीडित युवती पुढे येतील अशी शक्यता आहे. त्यानुसार पोलिसांनी त्यादिशेने तपासाला सुरुवात केली आहे.

अल्पवयीन मुली तसेच युवतींवर लैंगिक अत्याचार करून त्यांचे व्हिडीओ व फोटो सोशल मीडियावर व्हायरल करणे, पीडितांना ब्लॅकमेल करणे अशा विविध कारणांखाली सोहम विरोधात पॉक्सो कायद्याखाली गुन्हे नोंद केले. या प्रकरणाचा तपास गुन्हे अन्वेषण विभाग करीत असून त्यांनी गुरुवारी त्याच्या निवासस्थानी छापा टाकला होता.

लग्नाचे आमिष दाखवून फसवणूक

पोलिस सध्या आणखी किमान तीन पीडितांचे जबाब नोंदवण्याची तयारी करीत आहे. त्यामुळे येत्या काही दिवसांत या प्रकरणाबाबत आणखी काही महत्त्वाची माहिती उघड होण्याची शक्यता आहे. दरम्यान सोहमने लग्नाचे आमिष दाखवून अनेक पीडितांचे लैंगिक शोषण केले, त्यांच्या विश्वासाचा गैरफायदा घेऊन पीडितांशी शारीरिक संबंध ठेवल्याचे तपासात समोर आल्याची माहिती सुत्रांनी दिली.