पंपांवर विनाकारण गर्दी करू नये, ८ दिवस पुरेल एवढा पेट्रोलसाठा उपलब्ध: मुख्यमंत्री प्रमोद सावंत

राज्यात पेट्रोल टंचाई निर्माण झालेली नाही, असे मुख्यमंत्री प्रमोद सावंत यांनी स्पष्ट केले.

लोकमत न्यूज नेटवर्क, पणजी: राज्यात पेट्रोल टंचाई निर्माण झालेली नाही, असे मुख्यमंत्री प्रमोद सावंत यांनी स्पष्ट केले असून आठ दिवस पुरेल एवढा पेट्रोलसाठा उपलब्ध असल्याचा दावा केला आहे. लोकांनी पेट्रोल पंपांवर विनाकारण गर्दी करू नये, असे आवाहन त्यांनी केले आहे.

बुधवारी मंत्रिमंडळ बैठकीनंतर पत्रकार परिषदेवेळी माध्यम प्रतिनिधींनी त्यांना राज्यातील काही पेट्रोल पंपांवरील इंधन संपल्याचे तसेच वाहनधारकांच्या मोठ्या रांगा लागल्या असल्याचे निदर्शनास आणले असता मुख्यमंत्री म्हणाले की, 'मी केंद्र सरकारच्या संपर्कात आहे. लोकांनी पंपांवर रांगा लावून उगाच टाक्या फूल करू नयेत.

बुकिंगनंतर मिळणार १५ दिवसांत सिलिंडर

घरगुती गॅस सिलिंडरही पुरेशा प्रमाणात उपलब्ध आहेत. 'लोकांनी उगाच साठेबाजी करू नये. बुकिंग केल्यानंतर १५ दिवसात सिलिंडर मिळेल. व्यावसायिक एलपीजीच्या बाबत थोड्या अडचणी आहेत. त्यावर उपाययोजना केल्या जात आहेत.

'माझे घर'ला वर्षभराची मुदतवाढ

'माझे घर' योजनेचा कालावधी एक वर्षाने वाढविण्याचा निर्णय मंत्रिमंडळ बैठकीत घेण्यात आला. याच महिन्यात या योजनेची मुदत संपणार होती. परंतु आता वटहुकूम काढून मुदत वाढवण्याचा महत्त्वपूर्ण निर्णय मंत्रिमंडळाने घेतला आहे. याबाबत मुख्यमंत्री डॉ. प्रमोद सावंत म्हणाले की, लोकांना अर्ज भरण्यास सोयीस्कर व्हावे यासाठी मुदतवाढ देण्यात आली आहे.

तिवरे-वरगाव ग्रामपंचायतीला माशेल बसस्थानकावरील गाळ्याचे मासिक भाडे माफ करण्यास मंत्रिमंडळाची मंजुरी

वास्कोतील गोवा हाउसिंग बोर्डाच्या ५४४ घरांसाठी बांधकाम पूर्णता व अधिवास दाखला शुल्क माफ.