सोहमला पुन्हा पोलिस कोठडी, कार जप्त

सोहम नाईक याच्याविरुद्ध आतापर्यंत एकूण पाच गुन्हे नोंदविले आहेत.

लोकमत न्यूज नेटवर्क,पणजी / कुडचडे: कुडचडे येथील बहुचर्चित कथित लैंगिक अत्याचार प्रकरणात संशयित सोहम नाईक याच्या अडचणीत वाढ झाली असून, एका गुन्ह्यात न्यायालयीन कोठडीत पाठविण्यात आलेल्या सोहमला दुसऱ्या गुन्ह्यात पुन्हा सहा दिवसांची पोलिस कोठडी सुनावली आहे. या प्रकरणात सोहम नाईक याच्याविरुद्ध आतापर्यंत एकूण पाच गुन्हे नोंदविले आहेत.

या गंभीर प्रकरणाचा तपास करत असताना पोलिसांनी सोहमची कार जप्त केली आहे. विशेष म्हणजे, गुन्हे शाखेनेही तपासाचा भाग म्हणून त्याची कार ताब्यात घेतली आहे. गुन्ह्यासाठी या वाहनाचा वापर झाला असावा, असा पोलिसांचा संशय असून, त्या दृष्टीने आता पुरावे गोळा केले जात आहेत. पीडित मुलींना धमकावण्यासाठी किंवा या कृत्यांसाठी या वाहनाचा काही संबंध आहे का, याचा शोध पोलिस घेत आहेत.

सोहम याच्यावर अल्पवयीन मुलींचे लैंगिक शोषण करणे आणि त्यांच्या अश्लील चित्रफिती बनवून त्यांना ब्लॅकमेल केल्याचे अत्यंत गंभीर आरोप आहेत. पोलिसांनी न्यायालयाला सांगितले की, या प्रकरणातील गुंतागुंत पाहता आणि अधिक तांत्रिक पुरावे हस्तगत करण्यासाठी संशयिताची कसून चौकशी करणे आवश्यक आहे. गुन्हे शाखेकडून आता या प्रकरणाचा तपास अधिक तीव्र करण्यात आला असून, आगामी सहा दिवसांच्या कोठडीत या प्रकरणाचे धागेदोरे कुठेपर्यंत पसरले आहेत, हे स्पष्ट होण्याची शक्यता आहे.

गुन्हे शाखा व्हिडीओच्या शोधात 

संशयितावर ब्लॅकमेलिंगचे आरोप आहेत. व्हिडीओ व्हायरल करण्याची धमकी देऊन तो पीडितांना ब्लॅकमेलिंग करीत होता, असा त्याच्यावर ठपका असल्यामुळे हे व्हिडीओ पोलिसांना हवे आहेत. सोहमच्या फोनचे फॉरेन्सिक विश्लेषण अहवाल आल्यानंतर या बाबत पोलिसांच्या हाती काही तरी लागण्याची शक्यता आहे.