घरगुती सिलिंडरमधील होणारी गॅसची चोरी महिलांनी केली उघड; डिलिव्हरी बॉयचा काळा धंदा उजेडात

व्हिडिओ सोशल मीडियावर व्हायरल

लोकमत न्यूज नेटवर्क, मडगाव : तुमच्या घरात येणारा गॅस सिलिंडर १० ते १५ दिवसांतच संपतोय का? सिलिंडरचे वजन कमी भरतेय का? जर तुमचे उत्तर 'हो' असेल, तर ही बातमी तुमच्यासाठी अत्यंत महत्त्वाची आहे. शहरात गॅस सिलिंडरमधून गॅस चोरणारी एक मोठी टोळी सक्रिय असल्याचे एका खळबळजनक घटनेतून समोर आले आहे. गिरदोली येथील काही सतर्क महिलांनी गॅस डिलिव्हरी व्हॅनमध्ये चालणारा हा काळा धंदा रंगेहाथ पकडला असून, याचा व्हिडिओ आता समाजमाध्यमांवर व्हायरल होत आहे.

मिळालेल्या माहितीनुसार, गिरदोली येथे एका नामांकित कंपनीची गॅस डिलिव्हरी व्हॅन परिसरात आली असता, तेथील महिलांना संशय आला. व्हॅनमधील सिलिंडरवर एक काळे कापड झाकलेले होते. महिलांनी विचारणा केली असता, उन्हामुळे कापड टाकले आहे असे उत्तर डिलिव्हरी बॉयने दिले. मात्र, महिलांनी आग्रह धरून कापड हटवले असता, तिथे एका सिलिंडरमधून दुसऱ्या रिकाम्या सिलिंडरमध्ये गॅस भरणा केला जात असल्याचे धक्कादायक वास्तव समोर आले.

या तपासात असे दिसून आले की, प्रत्येक सिलिंडरमधून सुमारे २ ते ३ किलो गॅस चोरी केला जात होता. यामुळे सर्वसामान्य ग्राहकांना पूर्ण पैसे देऊनही वजनाने कमी गॅस मिळत आहे. या चोरीमुळेच ग्राहकांचा गॅस अवघ्या १०-१५ दिवसांत संपत असल्याचे तक्रारदार महिलांनी म्हटले आहे. रंगेहाथ पकडले गेल्यावर या कर्मचाऱ्यांनी आपले कृत्य झाकण्यासाठी महिलांना लाच देण्याचे आमिष दाखवले. 'पैसे घ्या आणि विषय संपवा, आम्ही तुम्हाला हवे तितके सिलिंडर मोफत देतो; पण पोलिसांत जाऊ नका,' अशी विनवणी त्यांनी केली. मात्र, संतप्त महिलांनी या प्रकरणाचा व्हिडिओ बनवून पुरावा गोळा केला.

तिघे ताब्यात

गॅसची ही चोरी केवळ आर्थिक फसवणूक नसून नागरिकांच्या जिवाशी खेळ आहे. रेल्वे ट्रॅक आणि निवासी भागाजवळ उभ्या असलेल्या या व्हॅनमध्ये गॅसची गळती होऊन एखादी ठिणगी पडली असती, तर मोठा स्फोट होण्याची शक्यता होती.

दोषींवर कारवाईची मागणी

संबंधित कर्मचारी नेहमीच ग्राहकांशी उद्धटपणे वागत असल्याचेही समोर आले आहे. सिलिंडरची मागणी केल्यावर बुकिंग रद्द झाल्याचे सांगून ग्राहकांना त्रास दिला जात होता. आता या प्रकरणाची सखोल चौकशी करून संबंधित एजन्सी आणि दोषी कर्मचाऱ्यांवर कठोर कारवाई करण्याची मागणी नागरिक करत आहेत. या टोळीत एक चालक आणि दोन मदतनीस असे तिघे सहभागी होते. जे पकडले गेल्यावर रेल्वे ट्रॅकच्या दिशेने पळून गेले.