Goa Fire :  कुटुंबाचा आधार गेला! पैसे कमावण्यासाठी गोव्यात आलेले दोन भाऊ; क्लबच्या आगीत झाला मृत्यू

गोव्यातील आरपोरा येथील एका प्रसिद्ध नाइट क्लबमध्ये शनिवारी मध्यरात्रीनंतर लागलेल्या भीषण आगीत आतापर्यंत २५हून अधिक लोकांचा होरपळून व गुदमरून मृत्यू झाला.

गोव्यातील आरपोरा येथील एका प्रसिद्ध नाइट क्लबमध्ये शनिवारी मध्यरात्रीनंतर लागलेल्या भीषण आगीत आतापर्यंत २५ हून अधिक लोकांचा होरपळून व गुदमरून दुर्दैवी अंत झाल्याची धक्कादायक घटना समोर आली आहे. ‘बर्च बाय रोमियो लेन’ नावाच्या या क्लबमध्ये आग लागली, तेव्हा पहिल्या मजल्यावरील डान्स फ्लोरवर बेली डान्सरचा कार्यक्रम सुरू होता आणि जवळपास १०० लोक उपस्थित होते.

कुटुंबाचा आधार हिरावला!

या दुर्घटनेत जीव गमावलेल्यांमध्ये झारखंड राज्यातील तीन तरुण कर्मचाऱ्यांचा समावेश आहे. यात लापुंग गावचे रहिवासी असलेले सख्खे भाऊ प्रदीप महतो (२४) आणि विनोद महतो (२०) यांचा समावेश आहे. प्रदीप आणि विनोद आपल्या गरीब कुटुंबाचा आधार बनण्यासाठी वर्षभरापूर्वी गोवा येथे कामासाठी आले होते. ते दर महिन्याला ३०,००० रुपये घरी पाठवत असत. त्यांच्या मोठ्या भावाला, फागू महतो यांना सकाळी ३ वाजता त्यांच्या मृत्यूची बातमी मिळाली. हे दोन्ही भाऊ पुढील वर्षी होळीसाठी घरी परतण्याची तयारी करत होते. त्यांच्या निधनामुळे मिठाईच्या दुकानावर अवलंबून असलेल्या त्यांच्या कुटुंबाचा मुख्य आधारच तुटला आहे.

काय आहे नेमकी घटना?

समोर आलेल्या माहितीनुसार, शनिवारी मध्यरात्रीनंतर ही दुर्घटना घडली. कार्यक्रमासाठी डान्स फ्लोरवर आकर्षक रोषणाई आणि ताड-पर्णांच्या सजावटीचा वापर करण्यात आला होता. काही प्रत्यक्षदर्शींच्या मते, इलेक्ट्रिक फटाक्यांमुळे ही आग लागली असावी, जी या ज्वलनशील सजावटीमुळे क्षणात भडकली.

आग लागल्याचे समजताच क्लबमध्ये एकच गोंधळ उडाला. बाहेर पडण्यासाठी रस्ते अरुंद असल्याने लोकांमध्ये प्रचंड धावपळ सुरू झाली. अनेकांनी तळमजल्यावरील स्वयंपाकघराच्या दिशेने धाव घेतली, परंतु तेथे असलेल्या छोट्या आणि अरुंद जिन्यामध्ये ते अडकले. बघता बघता संपूर्ण क्लबमध्ये धुराचे लोट पसरले. यामुळे अनेकांचा श्वास गुदमरला. बचाव पथकांना जिन्यामध्ये अडकलेल्या अवस्थेत अनेक मृतदेह सापडले आहेत, ज्यामुळे मृत्यूचे मुख्य कारण गुदमरून झाल्याचे स्पष्ट होत आहे. आग स्वयंपाकघरातील सिलिंडरमुळे लागली की डान्स फ्लोरवरून, हे अद्याप निश्चित झाले नसले तरी, आग पहिल्या मजल्यावरील सजावटीमुळे भडकल्याचे प्रत्यक्षदर्शींनी सांगितले.