‘गेल’ प्रकल्पाचा फज्जा

गॅस अथोरिटी आॅफ इंडियाने (गेल) गोव्यात राबविलेला सुमारे दीडशे कोटी रुपयांचा व ३६ किलोमीटर लांबीचा वायू पुरवठा प्रकल्प पहिल्या टप्प्यात यशस्वी ठरला; पण त्यानंतर या प्रकल्पाचे काम रखडले असून दुसऱ्या टप्प्यात प्रकल्पाचा फज्जा उडल्यासारखी स्थिती आहे. राज्यातील अनेक बडे उद्योग गॅस मिळण्याच्या प्रतीक्षेत आहेत. गॅस अथोरिटी आॅफ इंडियाचे अधिकारी हा प्रकल्प पुढे नेण्याचा प्रयत्न करत आहेत. डिचोली, फोंडा व मुरगाव तालुक्यात एकूण ३६ किलोमीटर लांबीची गॅस वाहिनी यशस्वीरीत्या टाकण्यात आली. मुरगाव तालुक्यातील झुआरी, रिलायन्स व अन्य एका उद्योगाला गेलकडून वायू पुरविलाही जात आहे. मात्र, डिचोली, फोंडा, वेर्णा, बार्देस आदी ठिकाणच्या उद्योगांना गॅस पुरविण्यासाठी वाहिन्या टाकण्याचे काम अडले आहे. नेस्ले, कोका कोला, बिनानी, बर्गर पेन्ट्स, एचईएल असे अनेक उद्योग आणि गोवा सरकारच्याही यंत्रणा गेलचा वायू स्वीकारण्यास तयार आहेत; पण त्यासाठी गोव्यातील ३६ किलोमीटर लांबीच्या मुख्य वायू वाहिनीला जोडून अन्य ज्या छोट्या वाहिन्या टाकायच्या आहेत, ते काम अडले आहे. सार्वजनिक बांधकाम खात्याने गेलला रस्त्याच्या कडेने वाहिन्या टाकण्यास सांगितले आहे; पण रस्त्याच्या कडेची जागा ही अनेक भागात बांधकाम खात्याची नाहीच, अशी माहिती प्रशासकीय पातळीवरून मिळाली. त्यामुळे गेलचा सुमारे १००-१५० कोटींचा प्रकल्प केवळ ३६ किलोमीटर लांबीची वाहिनी टाकण्यापुरता आणि मुरगावमधील तीन उद्योगांना वायू पुरविण्यापुरताच मर्यादित राहाणार काय, असा प्रश्न निर्माण होत आहे. कदंब वाहतूक महामंडळाच्या बसगाड्याही सीएनजीवर चालविण्याचा सरकारचा प्रस्ताव आहे.