विरोधकांच्या अपप्रचाराला बळी पडू नका; भाजप समर्थकांना दामू नाईक यांचे आवाहन

कुडतरीत कार्यकर्ता मेळावा

लोकमत न्यूज नेटवर्क, मडगाव : भाजप समर्थकांनी विरोधी पक्षांच्या अपप्रचाराला बळी पडू नये. देशाला महासत्ता बनवण्याचे पंतप्रधानांचे स्वप्न साकार करण्यासाठी त्यांना पाठिंबा द्या, असे आवाहन भाजप प्रदेशाध्यक्ष दामू नाईक यांनी शनिवारी (दि. ७) कुडतरी येथील कार्यकर्ता मेळाव्यात केले. यावेळी आमदार दिगंबर कामत, आमदार उल्हास तुयेकर, भाजप नेते अँथनी बाबर्बोझा, शर्मद पै रायतूरकर, प्रभाकर गावकर उपस्थित होते.

दामू नाईक म्हणाले की, कुडतरी मतदारसंघात भाजप वाढविण्यासाठी ३१ सदस्यांचे पथक काम करेल. गेल्या काही महिन्यांपासून मी गोव्यात ३८ मेळावे आयोजित करून ४० हजार कार्यकर्त्यांना भेटलो. सर्व भाजप स्वयंसेवकांनी भाजप सरकारने जनहितासाठी आणलेल्या योजना विसरू नयेत.

मेळाव्याला परिसरातील कार्यकर्ते, समर्थकांचा मोठा प्रतिसाद

यावेळी आमदार उल्हास तुयेकर यांच्यासह उपस्थित नेत्यांनी मेळाव्याला मार्गदर्शन केले. तसेच सरकारी योजना सर्वसामन्यांना समजावून सांगण्याचे आवाहनही केले. ज्यामुळे लोकांना भाजप सरकार राबवित असलेल्या योजनांची माहिती मिळविण्यासाठी सोपे जाईल. मेळाव्यासाठी भाजप कार्यकर्त्यांबरोबरच परिसरातील समर्थकही मोठ्या संख्येने उपस्थित होते.

डॉक्टर निलंबनाची माहिती घेणार

दरम्यान, मेळाव्यानंतर बोलताना प्रदेशाध्यक्ष नाईक यांनी गोवा वैद्यकीय महाविद्यालयात कार्यरत असलेल्या डॉक्टरच्या निलंबन प्रकरणाची चौकशी करण्याचे आश्वासन दिले. नाईक म्हणाले की, ते या प्रकरणाबाबत आरोग्यमंत्र्यांशी बोलतील आणि संपूर्ण प्रकरणाची माहिती घेतील.

समाजासाठी काम करा : कामत

मडगावचे आमदार कामत म्हणाले की, नरेंद्र मोदी पंतप्रधान झाले तेव्हा त्यांनी प्रत्येक राज्याची गरज ओळखली आणि लोकांसाठी विविध योजना आणण्यासाठी कठोर परिश्रम घेतले. मोदींचे स्वप्न भारताला पुन्हा एकदा महासत्ता आणि समृद्ध देश बनवण्याचे आहे.

भाजपच्या स्वयंसेवकांनी समाजाच्या भल्यासाठी काम करण्याची प्रतिज्ञा करावी. काँग्रेस पक्ष भाजपविरुद्ध फक्त चुकीचा प्रचार करत आहे, परंतु मोदी यांनी लोकांसाठी आणि अल्पसंख्याकांसाठी काय केले आहे हे लोकांनी आठवले पाहिजे.