जिल्हा पंचायत निवडणुकीतील भाजपच्या यशाचा दिल्लीत उल्लेख: दामू नाईक  

राष्ट्रीय अध्यक्ष ३० व ३१ रोजी गोव्यात येणार

लोकमत न्यूज नेटवर्क, पणजी: भाजपचे राष्ट्रीय अध्यक्ष नितीन नबीन यांनी दिल्लीत सर्व राज्यांमधील प्रदेशाध्यक्षांच्या घेतलेल्या बैठकीत दामू नाईक यांनी नुकत्याच झालेल्या जिल्हा पंचायत निवडणुकीतील पक्षाने प्राप्त केलेले यश तसेच आगामी निवडणुकांच्यादृष्टिने चालू असलेल्या तयारीवर भाष्य केले.

पत्रकारांनी दिल्ली भेटीबद्दल विचारले असता दामू म्हणाले की, बुधवारी संपूर्ण दिवस नव्या राष्ट्रीय अध्यक्षांनी बैठक घेतली. ते आता विविध राज्यांच दौरा करणार असून गोव्यात येत्या ३० व ३१ असे दोन दिवस त्यांची भेट निश्चित झाली आहे. त्यांच्या दौऱ्याचा सविस्तर कार्यक्रम निश्चित झाल्यानंतर तो जाहीर केला जाईल.

दक्षिण आणि उत्तर गोव्यात ते कार्यकर्त्यांना मार्गदर्शन करतील. काही राज्यांमध्ये येणाऱ्या काळात विधानसभा निवडणुका होणार आहेत. त्या राज्यांच्या प्रदेशाध्यक्षांनीही आपले मुद्दे बैठकीत मांडल्याचे दामू म्हणाले.