राज्यात आजपासून महाविद्यालयीन प्रवेश प्रक्रिया; डिजिटल पोर्टलवर करा अर्ज, ६ एप्रिलपर्यंत मुदत

राज्यातील एकूण ३४ महाविद्यालये या प्रक्रियेत सहभागी होत असून, पहिल्या फेरीसाठीचे ऑनलाइन प्रवेश पोर्टल २३ मार्च २०२६ रोजी दुपारी १२ वाजल्यापासून खुले होतील.

लोकमत न्यूज नेटवर्क, पणजी: उच्च शिक्षण संचालनालयाने शैक्षणिक वर्ष २०२६-२७ साठी पदवी स्तरावरील प्रवेश प्रक्रियेची घोषणा केली आहे. यावर्षीही संपूर्ण प्रक्रिया राष्ट्रीय शैक्षणिक धोरण २०२० च्या मार्गदर्शक तत्त्वांनुसार एकाच केंद्रीय डिजिटल पोर्टलद्वारे होणार आहे.

राज्यातील एकूण ३४ महाविद्यालये या प्रक्रियेत सहभागी होत असून, पहिल्या फेरीसाठीचे ऑनलाइन प्रवेश पोर्टल २३ मार्च २०२६ रोजी दुपारी १२ वाजल्यापासून खुले होतील. ६ एप्रिल २०२६ च्या मध्यरात्रीपर्यंत विद्यार्थ्यांना अर्ज करता येतील. तसेच, ज्या विद्यार्थ्यांचे निकाल अद्याप जाहीर झालेले नाहीत, त्यांनाही शैक्षणिक नुकसान टाळण्यासाठी तात्पुरत्या स्वरूपात अर्ज करण्याची विशेष सोय उपलब्ध करून देण्यात आली आहे.

उच्च शिक्षण संचालनालयाच्या https://www.dhe.goa.gov.in/ या संकेतस्थळावरील एकिकृत प्रक्रियेद्वारे २० हून अधिक विविध प्रकारचे बहुशाखीय अभ्यासक्रम विद्यार्थ्यांना उपलब्ध करून दिले जाणार आहेत. ही ऑनलाइन प्रणाली पारदर्शक आणि विद्यार्थी-केंद्रित असून, सर्व अर्जदारांना समान संधी मिळावी हा यामागचा मुख्य उद्देश आहे. या प्रवेश प्रक्रियेचे सर्वांत महत्त्वाचे वैशिष्ट्य म्हणजे अर्ज करण्यापासून ते प्रवेश निश्चितीपर्यतची सर्व प्रक्रिया ऑनलाइन असेल. त्यामुळे विद्यार्थ्यांना महाविद्यालयात प्रत्यक्ष जाण्याची आवश्यकता उरलेली नाही.

नवीन शैक्षणिक धोरणानुसार कौशल्य विकास आणि सर्वांगीण शिक्षणाला चालना देणारे अभ्यासक्रम निवडण्याची लवचिकता विद्यार्थ्यांना मिळेल.

अभ्यासक्रम, पात्रता आणि प्रवेश क्षमता याबद्दलची सविस्तर माहिती संबंधित महाविद्यालयांच्या संकेतस्थळावर ई-माहिती पुस्तिका उपलब्ध करून दिली आहे. उच्च शिक्षण संचालनालयाच्या या निर्णयामुळे राज्यातील विद्यार्थ्यांना घरबसल्या प्रवेश प्रक्रियेत सहभागी होता येणार आहे.

पाच पसंतीक्रम निवडण्याची मुभा

राज्य सरकारच्या उच्च शिक्षण संचालनालयाने सुरू केलेल्या या नवीन ऑनलाइन प्रवेश प्रक्रियेत विद्यार्थ्यांच्या सोयीसाठी पसंतीक्रमाची विशेष सुविधा उपलब्ध करून देण्यात आली आहे. या प्रणालीनुसार, अर्जदार आपल्या आवडीच्या आणि पात्रतेच्या आधारावर राज्यातील विविध महाविद्यालयांमधील जास्तीत जास्त पाच वेगवेगळ्या अभ्यासक्रमांसाठी पसंतीक्रम नोंदवू शकतात. त्यामुळे विद्यार्थ्यांना केवळ एकाच महाविद्यालयावर अवलंबून न राहता, विविध शैक्षणिक संस्थांमध्ये उपलब्ध असलेल्या बहुविद्याशाखीय अभ्यासक्रमांची निवड करण्याचे स्वातंत्र्य मिळाले आहे. ही लवचिकता विद्यार्थ्यांच्या करिअरच्या संधी वाढवणारी असून, प्रवेश प्रक्रियेतील स्पर्धात्मकता लक्षात घेता त्यांना आपल्या पसंतीच्या विषयांत प्रवेश मिळवणे अधिक सुलभ होणार आहे.

अर्ज कधीपासून ? : दि. २३ रोजी दुपारी १२ वाजल्यापासून.
अर्ज कधीपर्यंत ? : दि. ६ एप्रिलच्या मध्यरात्रीपर्यंत.