बारावीच्या प्रश्नपत्रिकेला आता 'बारकोड'; प्रश्नपत्रिकेचा फोटो व्हायरल केल्यास तत्काळ सापडणार

प्रश्नपत्रिकेचा कुणी फोटो वगैरे काढून तो व्हायरल केल्यास तत्काळ संबंधित पकडला जाणार आहे.

लोकमत न्यूज नेटवर्क, पणजी : राज्यात कालपासून इयत्ता बारावीच्या प्रश्नपत्रिकेचा यंदापासून बारकोडची सुरक्षा देण्यात आली आहे. त्यामुळे प्रश्नपत्रिकेचा कुणी फोटो वगैरे काढून तो व्हायरल केल्यास, तत्काळ संबंधित पकडला जाणार आहे.

सध्या सुरू असलेली परीक्षा यंदा अधिक सुरक्षित आणि शिस्तबद्ध पद्धतीने पार पडण्यासाठी गोवा शालान्त मंडळाने एक महत्त्वाचा बदल केला आहे. परीक्षेच्या दरम्यान किंवा नंतर प्रश्नपत्रिकेचा फोटो सोशल मीडियावर प्रसारित होण्याच्या घटनांना पायबंद घालण्यासाठी मंडळाने यंदा प्रत्येक प्रश्नपत्रिकेवर 'बारकोड'ची यंत्रणा कार्यान्वित केली आहे. विशेष म्हणजे, हा बारकोड प्रश्नपत्रिकेच्या केवळ पहिल्या पानावर नसून प्रत्येक पानावर छापण्यात आला आहे.

या नव्या तंत्रज्ञानामुळे प्रत्येक प्रश्नपत्रिकेची एक स्वतंत्र ओळख निर्माण झाली आहे. जर चुकूनही एखादी प्रश्नपत्रिका सोशल मीडियावर व्हायरल झाली, तर तो विशिष्ट संच कोणत्या विद्यार्थ्याला मिळाला होता, याची माहिती मंडळाला तत्काळ मिळणार आहे. या उपक्रमाचा मूळ उद्देश विद्यार्थ्यांमध्ये भीती घालणे हा नसून, परीक्षेची गोपनीयता आणि विश्वासार्हता टिकवून ठेवणे हा आहे.

केंद्रीय संस्थांच्या धर्तीवर पाऊल

देशातील केंद्रीय माध्यमिक शिक्षण मंडळासारख्या मोठ्या संस्थांनीदेखील अशा प्रकारच्या सुरक्षा उपाययोजनांचा यशस्वी वापर केला आहे, त्याच धर्तीवर आता गोवा बोर्डानेही हे पाऊल उचलले आहे. यामुळे बारावीच्या परीक्षेबरोबरच बारावीच्या प्रश्नपत्रिकेलाही विशेष दर्जा प्राप्त झाला आहे.

परीक्षेत शिस्त आणि सुरक्षितता राहावी यासाठी ही खबरदारी घेण्यात आली असून, आपली प्रश्नपत्रिका सुरक्षित ठेवणे ही आता विद्यार्थ्यांचीही नैतिक जबाबदारी बनली आहे. त्या अनुषंगाने आवश्यक त्या उपाययोजना शालान्त मंडळाने केल्या आहेत. - भगिरथ शेट्ये, अध्यक्ष, गोवा शालान्त मंडळ