शालेय स्वाध्याय पुस्तिका अप्राप्त

२६ जूनपासून शाळेला सुरुवात होणार असली तरी बहुतांश तालुक्यांमध्ये स्वाध्याय पुस्तिका उपलब्ध झाल्या नाही.

सात तालुक्यांतील समस्या : गणवेशाचा निधीही मिळाला उशिरा
गडचिरोली : २६ जूनपासून शाळेला सुरुवात होणार असली तरी बहुतांश तालुक्यांमध्ये स्वाध्याय पुस्तिका उपलब्ध झाल्या नाही. त्याचबरोबर चवथीचा इंग्रजी, सातवीचा परिसर अभ्यास व सहावीची हिंदीची पुस्तक प्राप्त झाली नाही.
मागील काही वर्षांपासून पहिली ते आठवीपर्यंतच्या सर्व विद्यार्थ्यांना मोफत पुस्तके पुरविण्याचे धोरण शासनाने अवलंबिले आहे. शाळेच्या पहिल्या दिवशीच विद्यार्थ्यांना नवीन पुस्तके व गणवेश उपलब्ध व्हावे, यासाठी शिक्षण विभाग व सर्व शिक्षा अभियानाचे कर्मचारी उन्हाळभर काम करीत राहतात. शाळा सुरू होण्याच्या पंधरा दिवसांपूर्वी गडचिरोली जिल्ह्यातील सर्व शाळांना पुस्तकांचा पुरवठा करण्यात आला. शाळेच्या पहिल्या दिवशी विद्यार्थ्यांना गणवेश, पुस्तके मिळाल्यास त्यांचा आनंद द्विगुणीत होते. विद्यार्थ्यांच्या मनात शाळेविषयी असलेली भीती कमी व्हावे, त्यांना शाळेत येण्यासाठी आनंद वाटावा, यासाठी शिक्षण विभागाने शाळेच्या पहिल्या दिवशी मान्यवरांच्या हस्ते विद्यार्थ्यांचे स्वागत करण्याचे धोरण अवलंबिले आहे.
शाळा सुरू होण्याला केवळ आठ दिवसांचा कालावधी शिल्लक असतानाही इयत्ता चवथीचा इंग्रजी, सातवीचा परिसर अभ्यास, सहावीचा हिंदी व सुमारे सात तालुक्यात स्वाध्याय पुस्तिका उपलब्ध झाल्या नाहीत. अजूनपर्यंत या पुस्तकांचा पुरवठा करण्यात आला नाही. त्यामुळे विद्यार्थ्यांना अपुऱ्या पुस्तका धरून शाळेत जावे लागणार आहे. विद्यार्थ्यांच्या शैक्षणिक बाबीचे मूल्यांकन करण्यासाठी स्वाध्याय पुस्तिका अत्यंत महत्त्वाच्या मानल्या जातात. मात्र अजूनपर्यंत स्वाध्याय पुस्तिकाही उपलब्ध झाल्या नाहीत. पुस्तका नेमक्या कधी येणार हे अजूनपर्यंत निश्चित झाले नाही. सदर पुस्तिका तत्काळ उपलब्ध करून देण्यात यावे, अशी मागणी पालकांकडून करण्यात येत आहे. (नगर प्रतिनिधी)