पाच दिवसांपासून धान खरेदी बंद

स्थानिक आदिवासी विविध कार्यकारी संस्थेच्यावतीने चालविण्यात येणाऱ्या धान खरेदी केंद्रावर धानाची खरेदी मागील पाच दिवसांपासून बंद पडली आहे. त्यामुळे शेतकरीवर्ग त्रस्त झाले

सिरोंचा : स्थानिक आदिवासी विविध कार्यकारी संस्थेच्यावतीने चालविण्यात येणाऱ्या धान खरेदी केंद्रावर धानाची खरेदी मागील पाच दिवसांपासून बंद पडली आहे. त्यामुळे शेतकरीवर्ग त्रस्त झाले असून धान खरेदी तत्काळ सुरू करावी, अशी मागणी शेतकऱ्यांकडून केली जात आहे.
सिरोंचा परिसरातील हे एकमेव धान खरेदी केंद्र असल्याने शेकडो शेतकरी हजारो क्विंटल धान विक्रीसाठी सिरोंचा येथील धान खरेदी केंद्रावर आणतात. मात्र आदिवासी विविध कार्यकारी संस्थेचे सचिव व अध्यक्ष यांच्या दुर्लक्षामुळे या ठिकाणची धान खरेदी मागील पाच दिवसांपासून बंद पडली आहे. शेतकऱ्यांनी आणलेले धान केंद्राच्या परिसरात अस्ताव्यस्त पडून आहेत. या धानावर परिसरातील डुकर, गायी, बकऱ्या डल्ला मारत आहेत. यामुळे शेतकऱ्याचे प्रतिदिवस किमान २०० ते ३०० रूपयांचे नुकसान होत आहे. या ठिकाणी धान ठेवण्यासाठी व्यवस्था नसल्याने शेतकऱ्यांनी धान उघड्यावरच ठेवले होते. तीन दिवसांपूर्वी आलेल्या पावसामुळे सदर धान भिजले. भिजलेले धान आता संस्था घेण्यास तयार नाही. त्यामुळे भिजलेले धान न्यावे कुठे, असा प्रश्न शेतकऱ्यांसमोर निर्माण झाला आहे. बहुतांश शेतकरी सावकार व बँकेकडून कर्ज काढून धानाची शेती केली. त्यांचे कर्ज देण्यासाठी फेडण्यासाठीच धान खरेदी केंद्रावर धान विक्रीसाठी आणले. मात्र येथील सचिव व अध्यक्षाच्या मनमानी कारभारामुळे बारदाना उपलब्ध असतानाही धान खरेदी बंद ठेवली जात आहे.
शेतकऱ्यांनी आणलेल्या दिवशीय धान खरेदी केली असती तर या नुकसानीपासून शेतकरी वाचू शकले असते. पुढील तोटा कमी करण्यासाठी संस्थेने धान खरेदी सुरू करावी, अशी मागणी रायुकाँचे तालुकाध्यक्ष सतिश भोगे, गादे, मेहरा, दाया पोचम, वासकुरी सत्यम, नुसेद्दी शंकर यांच्यासह शेतकऱ्यांनी केली आहे. (शहर प्रतिनिधी)