बहुआयामी कार्यक्रम हवा

राज्यासह गडचिरोली जिल्ह्यात तंबाखू मुक्तीसाठी दंडात्मक कारवाई न करता जनजागृती, कृती, प्रचार व प्रसार, माहिती, संस्कृती व वातावरण यासारखे .....

तंबाखू व दारूमुक्तीवर बैठक : अभय बंग यांचे प्रतिपादन
गडचिरोली : राज्यासह गडचिरोली जिल्ह्यात तंबाखू मुक्तीसाठी दंडात्मक कारवाई न करता जनजागृती, कृती, प्रचार व प्रसार, माहिती, संस्कृती व वातावरण यासारखे बहुआयामी उपाययोजना करून तंबाखूच्या सेवनापासून समाजावर होणाऱ्या विपरित परिणामाची जनजागृती व्हायला हवी, असे प्रतिपादन सर्चचे संचालक ज्येष्ठ सामाजिक कार्यकर्ते डॉ. अभय बंग यांनी केले.
गडचिरोली जिल्हाधिकारी कार्यालयात आयोजित दारू -तंबाखूमुक्त गडचिरोली जिल्हा विकास या कार्यशाळेत मंगळवारी ते बोलत होते. या कार्यक्रमाच्या अध्यक्षस्थानी जिल्हाधिकारी रणजीतकुमार होते. यावेळी अन्न व औषध प्रशासनाचे सहाय्यक आयुक्त एम. एस. केंबळकर, जिल्हा पोलीस अधीक्षक संदीप पाटील, अतिरिक्त जिल्हाधिकारी महेश आव्हाड, निवासी उपजिल्हाधिकारी सुनील गाडे, उपविभागीय अधिकारी दुर्वेश सोनवणे, जिल्हा शल्य चिकित्सक डॉ. प्रमोद खंडाते, जिल्हा आरोग्य अधिकारी डॉ. कमलेश भंडारी आदी उपस्थित होते. यावेळी जिल्हाधिकारी यांनी प्रत्येक कार्यालयाच्या दर्शनी भागात तंबाखूमुक्तीचा संदेश देणारे फलक लावावे, तसेच जिल्ह्यातील कार्यालय प्रमुखांनी आपल्या विभागाचा तंबाखूमुक्तीबाबतचा आकृतीबंध तयार करून ३० जूनपर्यंत जिल्हाधिकारी कार्यालयास सादर करावा, अशा सूचना दिल्या. या बैठकीत शोधग्रामचे संतोष सावळकर यांनी सादरीकरणातून माहिती दिली.