साडेतीन हजारांवर घरकूल अपूर्ण

राज्य शासनाच्या इंदिरा आवास योजनेंतर्गत सन २०१५-१६ या वर्षात गडचिरोली जिल्ह्यात एकूण ४ हजार ८६८ घरकूल मंजूर करण्यात आले.

उदासीनता : जुने घरकूल रखडलेले, नव्याची अंमलबजावणी ठप्पगडचिरोली : राज्य शासनाच्या इंदिरा आवास योजनेंतर्गत सन २०१५-१६ या वर्षात गडचिरोली जिल्ह्यात एकूण ४ हजार ८६८ घरकूल मंजूर करण्यात आले. यापैकी ३० आॅगस्टपर्यंत केवळ ४२९ घरकूल पूर्ण झाले असून तब्बल ३ हजार ९५१ घरकूल अपूर्ण स्थितीत आहेत. तसेच सन २०१६-१७ वर्षात नव्याने सुरू करण्यात आलेल्या प्रधानमंत्री आवास योजना ग्रामीण अंतर्गत ५ हजार ३३२ घरकूल बांधण्याचे उद्दिष्ट देण्यात आले आहे. यापैकी आतापर्यंत एकाही घरकुलाचे काम सुरू झाले नाही. एकूणच जुने घरकूल रखडले असून नव्या योजनेतील घरकूल बांधकामाची अंमलबजावणी थंडबस्त्यात असल्याचे दिसून येते. दारिद्र्य रेषेखालील गरीब व सर्वसामान्य कुटुंबाला हक्काचे घर मिळावे, यासाठी शासनाने इंदिरा आवास योजना हाती घेतली. या योजनेंतर्गत राज्यभरात घरकूल बांधकामाचे जिल्हास्तरावरील जिल्हा ग्रामीण विकास यंत्रणेला उद्दिष्टही दिले. मात्र वेळेवर बांधकाम साहित्य उपलब्ध न होणे, तसेच लाभार्थ्यांची उदासीनता या कारणामुळे गडचिरोली जिल्ह्यात घरकूल बांधकामाची गती प्रचंड मंद आहे. सन २०१५-१६ या वर्षात इंदिरा आवास योजनेंतर्गत अहेरी तालुक्यात १ हजार ९३ घरकूल मंजूर करण्यात आले. यापैैकी एकाही घरकुलाचे बांधकाम पूर्ण झाले नसून ९७१ घरकूल अपूर्णावस्थेत आहेत. आरमोरी तालुक्यात २११ मंजूर घरकुलांपैकी ४७ घरकुलाचे पूर्ण झाले असून १५५ घरकूल अपूर्ण आहेत. भामरागड तालुक्यात १५१ घरकुलांपैकी १० घरकूल पूर्ण झाले असून ९० घरकूल अपूर्णावस्थेत आहेत.चामोर्शी तालुक्यात ७७८ मंजूर घरकुलांपैकी ९४ घरकूल पूर्ण झाले असून ५८० घरकूल अपूर्णावस्थेत आहेत. देसाईगंज तालुक्यात ७६ घरकुलांपैकी १८ घरकूल पूर्ण झाले असून ५५ घरकूल अपूर्णावस्थेत आहे. धानोरा तालुक्यात ४२३ घरकुलांपैकी केवळ ८ घरकूल पूर्ण झाले असून ४०१ घरकुलांचे काम अपूर्णावस्थेत आहे. एटापल्ली तालुक्यात १५२ घरकुलांपैकी १४१ घरकूल अपूर्ण आहेत. गडचिरोली तालुक्यात ७०३ घरकुलांपैकी २०० घरकूल पूर्ण झाले असून ४५१ घरकूल अपूर्ण आहेत. कोरची तालुक्यात २७३ घरकुलांपैकी केवळ ४ घरकूल पूर्ण झाले असून २६५ घरकूल अपूर्णस्थितीत आहेत. कुरखेडा तालुक्यात ४४० घरकुलांपैकी ५० घरकूल पूर्ण झाले असून ३५७ घरकूल अपूर्ण आहेत. मुलचेरा तालुक्यात २९० घरकुलांपैकी केवळ ३ घरकूल पूर्ण झाले असून २७२ घरकूल अपूर्ण आहेत. सिरोंचा तालुक्यात २७८ घरकुलांपैकी केवळ ५ घरकूल पूर्ण झाले असून २७३ घरकुलांचे काम अपूर्णस्थितीत आहेत. (स्थानिक प्रतिनिधी)अहेरी तालुका पिछाडीवरअहेरी तालुक्याच्या अनेक गावांमध्ये सन २०१५-१६ यावर्षात इंदिरा आवास योजनेंतर्गत एकूण १ हजार ९३ घरकूल मंजूर करण्यात आले. या तालुक्यात एकाही घरकुलाचे काम ३० आॅगस्टपर्यंत पूर्ण करण्यात आले नाही. तब्बल ९७१ घरकुलाचे काम अपूर्णस्थितीत आहेत. घरकूल बांधकामात अहेरी तालुका सर्वाधिक पिछाडीवर असल्याचे दिसून येते.४७८ घरकुलांचा प्रारंभच नाहीगडचिरोली जिल्ह्याच्या १२ ही तालुक्यात सन २०१५-१६ मध्ये मंजूर करण्यात आलेल्या ४ हजार ८६८ घरकुलांपैकी ४७८ घरकुलांच्या कामांना वर्ष उलटूनही सुरुवात झाली नाही. यामध्ये अहेरी तालुक्यातील १२२, आरमोरी तालुक्यातील ९, भामरागड तालुक्यातील ५१, चामोर्शी तालुक्यातील १०४, देसाईगंज तालुक्यातील ३, धानोरा तालुक्यातील १४, एटापल्ली तालुक्यातील ११, गडचिरोली ५२, कोरची ४, कुरखेडा ३३ व मुलचेरा तालुक्यातील ७५ घरकुलांचा समावेश आहे. प्रशासनाच्या वतीने वारंवार संबंधित लाभार्थ्यांना सूचना देऊनही काम हाती घेण्यात आले नाही.