देसाईगंज येथील भूमिगत पुलाच्या अप्रोच मार्गांवरून केवळ दुचाकी, ट्रॅक्टर, कार, चारचाकी वाहनेच आवागमन करू शकत असल्याने व रेल्वे पुलाची उंची फक्त ३.६० मीटरच असल्याने मालवाहतूक वाहने बायपास मार्गाने वळविण्यावाचून पर्याय नाही. मात्र, या मार्गाची झालेली दुरवस्था पाहून जड वाहतूकदारांसाठी डोकेदुखी आहे.
विशेष म्हणजे, रेल्वे गाड्यांच्या आवागमनामुळे वेळोवेळी रेल्वे फाटक बंद करण्यात येत असल्याने अनेकदा वाहतुकीचा खोळंबा होताे. अवजड वाहने उभी ठेवावी लागतात. त्यातही तीन किलोमीटर अधिकचा फेरा मारून वाहतूक करावी लागते. हा मार्ग अद्यापही दुर्लक्षित असून बांधकामाचे भिजत घोंगडे कायम असल्याने तीव्र संताप व्यक्त करण्यात येत आहे. जड वाहतुकीच्या सोयीसाठी तातडीने या रस्त्याचे बांधकाम करण्याची मागणी अवजड वाहनधारकांनी केली आहे. वाढत्या लोकसंख्येच्या प्रमाणात वाढती वाहतूक व पावसाळ्यात होणारी पर्यायी मार्गाची दुरवस्था लक्षात घेता शहरात फ्लाॅयओव्हर निर्माण करण्याची गरज नागरिक बाेलून दाखवित आहेत.
बाॅक्स
राष्ट्रीय महामार्ग कुठून जाणार?
सिरोंचा-आष्टी-चामोर्शी- गडचिरोली-आरमोरी-देसाईगंज- साकोली या राज्यमार्ग ३५३ सी.चे राष्ट्रीय महामार्गात रूपांतर करण्याचा निर्णय घेण्यात आला होता. या संदर्भात २ जानेवारी २०१६ राेजी तांत्रिक निविदाही काढण्यात आली. नवनिर्मित राष्ट्रीय महामार्गासाठी १६२.२२ कोटी रुपयांचा निधी मंजूर करण्यात येऊन हे काम तीन महिन्यांत पूर्ण करायचे होते. मात्र, हे काम अद्यापही संथगतीनेच सुरू होऊन सद्य:स्थितीत काम बंदच असल्याने हा मार्ग शहराच्या जुन्याच मार्गाने जाणार की बायपासने, याबाबत अद्यापही संभ्रम कायम आहे.