अपंग आचलच्या यशाला शिक्षक भारतीची ‘शाब्बासकी’

कुरखेडा तालुक्यातील घाटी येथील कै. विठ्ठलराव बनपुरकर विद्यालयातील दोन्ही हातांनी अपंग असलेल्या आचल राऊत

गडचिरोली : कुरखेडा तालुक्यातील घाटी येथील कै. विठ्ठलराव बनपुरकर विद्यालयातील दोन्ही हातांनी अपंग असलेल्या आचल राऊत या विद्यार्थिनीने दहावीच्या परीक्षेत ७७.४० टक्के गुण मिळविले आहे. आचलच्या या यशाचे शिक्षक भारती संघटनेने पाच हजार रूपयांची भेट आचलला देऊन तिचे कौतुक केले.
लोकमत कार्यालयात मंगळवारी सकाळी हा कार्यक्रम पार पडला. यावेळी शिक्षक भारती संघटनेचे गडचिरोली जिल्हाध्यक्ष एम. एन. चलाख, लोकमत जिल्हा प्रतिनिधी अभिनय खोपडे, लोकमत समाचारचे जिल्हा प्रतिनिधी सुनिल चौरासिया आचलचे वडील प्रदीप राऊत, आचल व धानोरा येथील जिल्हा परिषद शाळेचे शिक्षक डी. टी. कोहाडे, व लोकमत परिवारातील सदस्य उपस्थित होते.
या कौतुक सोहळ्यात बोलताना चलाख यांनी आचलच्या जिद्द व चिकाटी या गुणांचे कौतुक करून पायलचे यश सर्वसामान्य विद्यार्थ्यांसाठीही प्रेरणादायी असल्याची भावना व्यक्त केली. आचलच्या या यशाची गौरवगाथा शिक्षक भारतीचे आमदार कपिल पाटील यांनाही आपण सांगितल्याचे त्यांनी सांगितले.
यावेळी चलाख यांनी आपल्यातर्फे पाच हजार रूपयांचे धनादेश आचल व आचलचे वडील प्रदीप राऊत यांना सुपूर्द केला. भविष्यातही आवश्यक ते सहकार्य आचलला करू, असेही चलाख यांनी या कार्यक्रमात सांगितले. लोकमतमध्ये आचलच्या यशाची बातमी पहिल्यांदा वाचली व त्यातूनच तिला मदत करण्याची प्रेरणा मिळाली. त्यामुळेच लोकमतच्या पुढाकारातून तिला भेट म्हणून पाच हजार रूपये देण्याचा निर्णय आपण घेतला, असेही चलाख यांनी यावेळी सांगितले.

विज्ञान शाखेच्या शिक्षणातून करिअर घडविणार!
४आचलची आई घाटी येथील शासकीय आश्रमशाळेत महिला अधीक्षक पदावर कार्यरत आहे. आचलने वर्ग १ ते ७ पर्यंतचे शिक्षण कोरची येथे आश्रमशाळा व जिल्हा परिषद शाळेत पूर्ण केले. आठवी ते दहावीचे शिक्षण कै. विठ्ठलराव बनपुरकर विद्यालय घाटी येथून पूर्ण केले व आता अकरावी विज्ञान शाखेत कुरखेडा येथील विद्याभारती महाविद्यालयात प्रवेश घेणार आहे. विज्ञान शाखेच्या शिक्षणातून करिअर घडविणार असे तिने यावेळी सांगितले.