प्रसिद्ध भजन गायक अनुप जलोटा यांनी खरंच धर्म बदलला? जाणून घ्या, व्हायरल फोटोमागचं सत्य

Fact Check Anup Jalota News: अनुप जलोटा यांनी इस्लाम धर्म स्वीकारल्याचा व्हायरल पोस्टमध्ये दावा करण्यात येत आहे

Claim Review : अनुप जलोटा यांनी धर्म बदलल्याचा दावा करण्यात आला

Claimed By : Facebook User

Fact Check : चूक

Created By: विश्वन्यूज
Translated By: ऑनलाईन लोकमत

प्रसिद्ध भजन गायक अनुप जलोटा यांचा एक फोटो सोशल मीडियावर व्हायरल होत आहे. या फोटोत त्यांनी हिरव्या कुर्ता आणि मुस्लीम बांधव घालतात तशी टोपी घातली आहे. काही युजर्स हा फोटो शेअर करत आहेत आणि असा दावा करत आहेत की, अनुप जलोटा यांनी इस्लाम धर्म स्वीकारला आहे. विश्वास न्यूजच्या तपासात हा दावा खोटा असल्याचे आढळून आले आहे. खरेतर, अनुप जलोटा यांचा व्हायरल केला जात असलेला फोटो त्यांच्या 'भारत देश है मेरा' या चित्रपटाच्या शूटिंग दरम्यानचा आहे. पण सध्या तो फोटो खोट्या दाव्यासह शेअर केला जात आहे.

काय आहे प्रकरण?

फेसबुक वापरकर्ता Kanhaiya Dixit ने १९ मार्च २०२५ रोजी पोस्ट करत लिहिले की, “हे प्रसिद्ध भजन गायक, अनुप जलोटा आहेत ज्यांचे भजन जवळजवळ प्रत्येक हिंदू घरात आणि मंदिरात ऐकले जाते. काही दिवसांपूर्वी, त्यांनी त्यांच्यापेक्षा ५० वर्षांनी लहान असलेल्या मुलीशी प्रेम प्रसंग केला होता. जास्त तपशीलात जाणे योग्य नाही, पण तेव्हा त्यांचे चारित्र्य उघड झाले होते. आता ते आणखी पुढे निघून गेले आहेत. त्यांनी आपला धर्मच बदलला आहे. आता नाव पण बदला.”

या फेसबुक पोस्टची अर्काईव्ह लिंक पाहण्यासाठी येथे क्लिक करा.

तपास 

व्हायरल दाव्याची चौकशी सुरू करताना, आम्ही गुगल ओपन सर्चचा वापर केला. आम्ही अनुप जलोटा यांच्याशी संबंधित बातम्या, संबंधित कीवर्ड टाइप करून शोधण्यास सुरुवात केली. त्यांनी इस्लाम धर्म स्वीकारला आहे, याची पुष्टी करणारी कोणतीही बातमी आम्हाला सापडली नाही. परंतु शोधाच्या दरम्यान, आम्हाला अशा अनेक बातम्या सापडल्या ज्यात लिहिले गेले की, हा त्याच्या चित्रपटाच्या शूटिंगमधील एक फोटो आहे. आम्हाला ndtv.in या वेबसाइटवर एक बातमी सापडली. २० मार्च २०२५ रोजी प्रकाशित झालेल्या बातमीत असे लिहिण्यात आले होते की, भजन गायक अनुप जलोटा यांनी आपला धर्म बदलला नाही. हा त्यांच्या चित्रपटाच्या शूटिंगमधील फोटो आहे. अनुप जलोटा यांनी त्यांच्या आगामी चित्रपटाचे शूटिंग सुरू केले आहे, ज्यामध्ये ते दुहेरी भूमिकेत दिसणार आहेत. हे फोटो त्यावेळचे आहेत, जे खूप व्हायरल होत आहेत.

व्हायरल फोटोशी संबंधित बातम्या, इतर अनेक न्यूज वेबसाइटवर देखील आढळल्या.

तपास पुढे नेत, आम्ही अनुप जलोटा यांचे सोशल मीडिया हँडल तपासले. आम्हाला अनुप जलोटा यांच्या इंस्टाग्राम हँडलवर व्हायरल झालेले फोटो सापडले. 18 मार्च 2025 रोजी शेअर केलेल्या पोस्टमध्ये असे लिहिले आहे की, “नाशिक या शहरात 'भारत देश है मेरा' या चित्रपटाचे शूटींग करण्यास उत्सुक आहे! #BhaaratDeshHaiMera #ShootingInNasik #FilmProduction #Bollywood #OnSet #BehindTheScenes #IndianCinema #Nasik”

आम्हाला येथे इतरही काही फोटो सापडले, जे 'भारत देश है मेरा' चित्रपटाच्या शुटिंगमधील असल्याचे सांगितले जाते. व्हायरल पोस्टच्या पुष्टीसाठी दैनिक जागरणच्या वरिष्ठ पत्रकार स्मिता श्रीवास्तव, ज्या मुंबईत बॉलीवूड कव्हर करतात, यांच्याशी संपर्क साधण्यात आला. त्यांनी आम्हाला पुष्टी केली की, व्हायरल दावा खोटा आहे. हा फोटो अनुप जलोटा यांच्या चित्रपटाच्या शुटिंगमधील आहे.

शेवटी, आम्ही पोस्ट शेअर करणाऱ्या वापरकर्त्याचे प्रोफाइल स्कॅन केले. फेसबुकवर या वापरकर्त्याला केवळ १८ हजार लोक फॉलो करतात.

निष्कर्ष: अनुप जलोटा यांच्या फोटोबद्दल केला जात असलेला दावा खोटा असल्याचे आढळून आले आहे. त्यांनी इस्लाम स्वीकारलेला नाही. हा फोटो त्यांच्या चित्रपटाच्या चित्रीकरणाच्या वेळचा आहे.

(सदर फॅक्ट चेक विश्वन्यूज या वेबसाइटने प्रसिद्ध केलं आहे. 'शक्ती कलेक्टिव्ह'चा भाग म्हणून 'लोकमत डॉट कॉम'ने त्याचा अनुवाद केला आहे.)