धुळे : शिंदखेडा तालुक्यातील कमखेडा शिवारात युवकाचा गळा आवळून खून केल्याची घटना मंगळवारी सायंकाळी उघडकीस आली. याबाबत नंदुरबार येथील महिलेसह तिच्या साथीदारांविरुद्ध गुन्हा दाखल झाला.
विलास ऊर्फ विशाल प्रकाश कोळी (२२, रा. शिवाजी चौक, पोस्ट ऑफीस गल्ली, खेतीया, ता. पानसेमल, जि. बडवानी) असे मृत युवकाचे नाव आहे. मृत युवकाची आई भारतीबाई प्रकाश कोळी यांनी नरडाणा पोलीस ठाण्यात फिर्याद दाखल केली. त्यानुसार, रविवारी सकाळी साडेसात वाजेच्यापूर्वी शिंदखेडा तालुक्यातील कमखेडा गावाच्या शिवारात संजय नारायण शिंदे यांच्या शेताच्या बांधावर रोडलगत विलास कोळी हा मृतावस्थेत मिळून आला. याप्रकरणी सुरुवातीला अकस्मात मृत्यूची नोंद करण्यात आली होती. घटनेची माहिती मिळताच उपविभागाीय पोलीस अधिकारी अनिल माने, नरडाणा पोलीस ठाण्याचे सहायक पोलीस निरीक्षक मनोज ठाकरे यांच्यासह पोलिसांचा फौजफाटा घटनास्थळी दाखल झाला होता.
अधिकाऱ्यांनी घटनास्थळी भेट देऊन पाहणी केली. संशयितांचा शोध सुरू करण्यात आला. तपास सुरू असताना रेशमा ऊर्फ लक्ष्मी ज्ञानदेव काशीकर (रा. कजंरवाडा, नंदुरबार) या महिलेसह इतर साथीदारांनी अज्ञात कारणावरून कुठल्यातरी वस्तूने गळा आवळून त्याचा खून केल्याचे प्रथमदर्शनी समोर आले आहे. त्यामुळे वाढीव कलमान्वये त्या महिलेविरुध्द संशयावरून खुनाचा गुन्हा मंगळवारी सायंकाळी उशिरा दाखल करण्यात आला.
दरम्यान, १ एप्रिल रोजी दोंडाईचा येथे शाहबाज शाह गुलाब शाह, २ एप्रिल रोजी धुळ्यात विशाल गरुड, ८ एप्रिल रोजी साक्री तालुक्यातील देशशिरवाडे येथे देवेंद्र साळवे आणि ११ एप्रिल रोजी धुळ्यातील कुमारनगरात वासुदेव दर्यानानी या व्यवसायिकाच्या खुनाची घटना घडली आहे.