कॉलेजमधल्या प्रेयसीसाठी जवानाने पत्नीला दिले विषारी इंजेक्शन; मृत्यू होईपर्यंत शेजारीच होता बसून

अनैतिक संबंधातून धुळ्यात विवाहितेचा इंजेक्शन देवून खून करण्यात आल्याचा धक्कादायक प्रकार समोर आला आहे.

धुळे : शहरातील वलवाडी शिवारातील रहिवासी व भारतीय सैन्यात क्लर्क असलेल्या कपिल बागुल याने आपले दुसऱ्या महिलेशी असलेले प्रेमसंबंध पत्नीला माहिती पडले म्हणून पत्नी पूजा (वय ३८) हिचा पेस्टिसाईडचे इंजेक्शन देऊन खून केल्याचे उघडकीस आले आहे. याप्रकरणी खुनाचा गुन्हा दाखल करून संशयित आरोपी पती कपिलसोबत आई, बहीण आणि प्रेयसी या चार जणांना अटक करण्यात आली आहे.

भारतीय सैन्यात क्लार्क पदावर कार्यरत कपिल बाळू बागूल (वय ४३) याचे विवाह २०१० मध्ये धडगाव जि.जळगाव येथील पूजा हिच्याशी झाला.लग्नानंतर त्याला ९ वर्षाची मुलगी आणि सात वर्षाचा मुलगा आहे. कपिलचे शिक्षण धुळ्यातील जयहिंद महाविद्यालयात झाले आहे. कपिलचे जयहिंद महाविद्यालयात असताना एका तरुणीशी त्याचे प्रेमसंबंध होते. या तरुणीचे लग्न २००७ ला एका इसमाशी झाले. तिला देखील १७ आणि १३ वर्षाच्या दोन मुली आहेत. तिचा घटस्फोट अंतिम टप्यात आहे. काही वर्षी पूर्वी ती आणि कपिल पुन्हा भेटले आणि ते लॉजमध्ये देखील भेटू लागले.

कपिलचे प्रेम प्रकरण पुजाला माहिती पडले. पत्नी पुजाचा काटा काढण्याचा प्लॅन तयार केला. त्यानुसार कपिलने गुरुवारी सायंकाळी पुजाला पेस्टिसाईडचे इंजेक्शन दिले. इंजेक्शनमुळे पुजाचा मृत्यू झाला. तिला श्री गणेश हॉस्पिटलमध्ये नेले. हॉस्पिटलमधील डॉक्टरांनी पुजाला सिव्हील हॉस्पीटलमध्ये न्यायला सांगितले. मात्र कपिलने इतरांच्या मदतीने तिचा अंत्यविधीची तयारी सुरु केली. दरम्यान, पुजाच्या भाऊ भूषण शिवाजी महाजन (वय ३५) रा. भडगाव याला कपिलने मोबाईलवरुन सांगितले की, पुजाचा मृत्यू झाला आहे. तू लगेच निघ. हे ऐकल्यावर भूषण हा आपल्या नातेवाईकांसोबत तातडीने धुळ्यात दाखल झाला. दरम्यानच्या काळात याबाबत देवपूर पश्चिम पोलिस स्टेशनला ही माहिती कळाली. तातडीने घटना स्थळी येऊन पोलिसांनी पूजाचा मृतदेहाचे पोस्टमार्टमसाठी पाठविला.

कपिलने पुजाला खाली पाडून बळजबरीने इंजेक्शन दिले. कपिल आणि संबंधित लोकांनी तिला चक्क पकडून तिच्या हातावर पाय ठेवून तिला इंजेक्शन दिले आणि मारून टाकले आहे. पूजाचा हात आणि तोंड या इंजेक्शन मुले काळे निळे पडले होते.

पश्चिम देवपूर पोलिस स्टेशनला यासंदर्भात खूनाचा गुन्हा दाखल करण्याचे काम रात्री उशीरापर्यंत सुरु होते. दरम्या पोलिसांनी पुजाचा पती कपिल बागुल, सासू विजया बाळू बागूल, नणंद रंजना धनेश माळी रा. छत्रपती संभाजीनगर आणि प्रेयसीला अटक केली आहे.

पूजाच्या मरणाची दीड तास वाट पाहिली

कपिलने पूजाला पेस्टिसाईडचे इंजेक्शन दिला. तेव्हा तिचा तोंडातून फेस यायला लागला. पूजाचा मृत्यू दीड तासाने झाला. तो पर्यंत कपिल तिच्याकडे पाहत बसला होता.

कपिल हा बी. ए. आहे. तर मयत पूजा बीएससी बी.एड. आहे. तर प्रेयसी बीएससी एमबीए आहे.

कपिल हा नेहमी पूजाला मारहाण करायचा त्रास द्यायचा. यासंदर्भात पूजाने आपल्या भावांसोबत जाऊन जळगाव येथील महिला आयोगाकडे याबाबत तक्रार केली होती. मात्र नंतर बहिणीचे लग्न तुटू नये यासाठी ही तक्रार मागे घेतली होती, असे भूषण महाजन याने 'लोकमत'ला सांगितले.