पूजा बागुल हत्या प्रकरणात मोठा खुलासा; सैन्यदलातील पतीनेच दिली होती पत्नीला संपवण्याची सुपारी

धुळ्याच्या पूजा बागुल हत्या प्रकरणात आणखी चार जणांना अटक करण्यात आली आहे.

Pooja Bagul Case: धुळ्यातील पूजा बागूल खूनप्रकरणी पोलिसांनी आणखी एक धक्कादायक खुलासा केला आहे. ३० मे रोजी पूजा बागुल या विवाहितेचा सैन्य दलात कर्मचारी असलेल्या पतीने विषारी इंजेक्शन देऊन खून केला होता. पतीसह कुटुंबीयांनी विवाहितेचा मानसिक व शारीरिक छळ करून तिची हत्या केल्याचा आरोप पूजाच्या कुटुंबियांनी केला होता. पूजाच्या मृत्यू प्रकरणाचा तपास करताना पोलिसांनी एका विधिसंघर्षित मुलासह चारजणांना अटक केली आहे. मयत पूजा बागुलला मारण्यासाठी पती कपिल बागुलने धुळ्यातील चारजणांना सुपारी दिल्याचे पोलीस तपासात उघड झालं आहे.

धुळे येथील देवपुरातील वलवाडीत २९ मे रोजी शारदा ऊर्फ पूजा बागुल हिचा खून झाला होता. अवघ्या काही तासांतच पश्चिम देवपूर पोलिसांनी तिचा पती कपिल बागुल, त्याचे वडील बाळू बागुल, आई विजया बागुल, बहीण रंजना धनेश माळी तसेच प्रेयसी प्रज्ञा कर्डिले यांना अटक केली होती. त्यानंतर कपिल यानेच पत्नीला पेस्टिसाइडचे इंजेक्शन दिल्याचे पोलिसांसमक्ष कबूल केले होते. मात्र, या हत्याकांडात भूषण बापू काळे (२०), यश ऊर्फ जयेश अनिल जगताप (१९), सचिन ऊर्फ बब्या दौलत जाधव (३५) आणि दोन विधिसंघर्षित मुलांनी मदत केल्याचे पोलीस तपासात उघड झालं आहे. त्यामुळे या प्रकरणात अटक करण्यात आलेल्यांची संख्या नऊवर पोहोचली आहे.

पूजा बागुलची हत्या करण्यासाठी या चौघांना पाच लाखांची सुपारी देण्यात आल्याचे कपिलने कबूल केले आहे. त्यानुसार पोलिसांनी गुरुवारी पहाटे संशयितांना ताब्यात घेतले. चौघांनी पूजा बागुलच्या हत्येची कबुली दिली. कपिल बागुलचे प्रज्ञा कर्डीले हिच्याशी असलेल्या अनैतिक संबंधांना पुजाने विरोध केला होता. त्यामुळे त्याने पूजाच्या हत्येचा कट रचला होता. कपिल बागुल हा प्रेयसीला तिच्या मुलांसह घरी आणायचा. या सगळ्या प्रकाराला विरोध केल्यानंतर कपिल पूजाला अजून चार विवाह करेल, अशी धमकी देत होता.

प्रज्ञाने जादूटोणा करुन पूजाला संपवण्याची योजना कपिलला सांगितली होती. मात्र दोन वेळा प्रयत्न करुन काही न झाल्याने कपिल आणि प्रज्ञाने जादूटोणा करणाऱ्या मांत्रिकाला पैसे मागण्यास सुरुवात केली होती. त्यानंतर मांत्रिकाने आम्ही पेस्टिसाइडचे इंजेक्शन देऊन पूजाला मारु असं सांगितले. त्यानुसार त्यांनी पूजाच्याच घरात तिला इंजेक्शन दिले आणि तिला मारहाण केली. मात्र तिचा मृत्यू न झाल्याने सर्वजण तिथेच वाट पाहत होते. शेवटी पूजाचा मृत्यू झाल्यानंतर त्यांनी तिला रुग्णालयात दाखल करण्याचे नाटक केले. मात्र मारहाणीच्या खुणांमुळे पूजाच्या भावाला संशय आला आणि त्याने पोलिसांनी याबाबतची माहिती दिली. त्यानंतर हा सगळा धक्कादायक प्रकार उघडकीस आला.