धुळे : जिल्ह्यात सुरू असलेल्या कोरोना लसीकरणात तरुणांपेक्षाही ज्येष्ठ नागरिकांचा उत्साह जास्त दिसून येतो आहे. आतापर्यंत जिल्ह्यात १ लाख नागरिकांनी कोरोनाची लस घेतली आहे. ९२ हजार २०४ नागरिकांनी पहिला डोस घेतला आहे तर ८ हजार १३४ नागरिकांनी दुसरा डोस घेतला आहे. ४५ वर्षांवरील ७० हजार १४८ नागरिकांनी लस घेतली आहे. त्यात ज्येष्ठ नागरिकांची संख्या अधिक आहे.
१६ जानेवारीपासून जिल्ह्यात कोरोनाचे लसीकरण सुरू झाले आहे. सुरुवातीला आरोग्य कर्मचाऱ्यांचे लसीकरण करण्यात आले. त्यानंतर दुसऱ्या टप्प्यात फ्रंटलाइन कर्मचाऱ्यांना लस देण्यात आली. त्यात पोलीस कर्मचारी, होमगार्ड व इतर कर्मचाऱ्यांचा समावेश होता. पुढच्या टप्प्यात ६० वर्षांवरील नागरिकांना लस देण्यात आली. कोरोना लसीकरणाला ज्येष्ठ नागरिकांचा प्रतिसाद चांगला राहिला आहे. तसेच ४५ वर्षांवरील नागरिकांच्या लसीकरणालाही सुरुवात झाली आहे. मात्र, पुरेसे डोस उपलब्ध नसल्याने लसीकरणात खोडा पडला आहे. जिल्ह्यात ४५ वर्षांवरील नागरिकांची संख्या ७ लाख २२ हजार इतकी आहे. ४५ वर्षांवरील नागरिकांची संख्या लक्षात घेता ८ लाख डोसची मागणी आरोग्य विभागाने केली होती. मात्र, मिळालेले ३३ हजार डोस आठवडाभरातच संपले आहेत.
धुळे शहरात सर्वाधिक लसीकरण
- धुळे शहरात लसीकरणाला चांगला प्रतिसाद मिळतो आहे. आतापर्यंत शहरातील १६ हजार ४९२ नागरिकांनी कोरोनाची लस टोचून घेतली आहे. लसीकरण केलेल्या व्यक्तींमध्ये आरोग्य कर्मचारी, फ्रंटलाइन कर्मचारी यांच्यासोबतच ज्येष्ठ नागरिकांची संख्या लक्षणीय आहे. १३ हजार ८९१ जणांनी पहिला तर २ हजार ६०१ जणांनी दुसरा डोस घेतला आहे.
ग्रामीण भागात उत्साह -
ग्रामीण भागात कोरोना लसीकरणाचा उत्साह दिसून येतो आहे. एकूण ६३ केंद्रांवर लसीकरण सुरू आहे. त्यापैकी २० केंद्र धुळे शहरात तर ४३ केंद्र ग्रामीण भागात आहेत. तसेच ग्रामीण भागात आणखी ९२ केंद्र सुरू करण्याचे जिल्हा आरोग्य विभागाचे नियोजन आहे. पहिल्या टप्प्यात ग्रामीण भागात आठवड्यातून केवळ तीन दिवस लसीकरण करण्यात येत होते. आता मात्र आरोग्य केंद्र व उपकेंद्रांवर दररोज लसीकरण होत आहे. लस टोचून घेण्यासाठी ज्येष्ठ नागरिकांची गर्दी होत आहे.
प्रतिक्रिया -
आतापर्यंत जिल्ह्यातील १ लाख नागरिकांनी कोरोनाची लस घेतली आहे. त्यात ९२ हजार जणांनी पहिला तर ८ हजार जणांनी दुसरा डोस घेतला आहे. जिल्ह्यात कोरोना लसीकरणाला चांगला प्रतिसाद मिळतो आहे. सध्या कमी डोस उपलब्ध आहेत. मात्र, शासनाकडे अधिक डोसची मागणी केली आहे.
डॉ. संतोष नवले, जिल्हा आरोग्य अधिकारी
एकूण लसीकरण केंद्र - ६३
हेल्थ केअर वर्कर - १२,९८४
फ्रंटलाइन वर्कर - ९,६७०
४५ वर्षांवरील व ज्येष्ठ नागरिक - ७०,१४८
पहिला डोस घेतलेले एकूण - ९२,८०२
दुसरा डोस घेतलेले एकूण - ८,३५५