उस्मानाबाद - वाहतूक नियमांचे उल्लंघन केल्या प्रकरणी जिल्ह्यातील अठरा पाेलीस ठाणी व वाहतूक शाखेकडून सुमारे २२२ चालकांविरूद्ध दंडात्मक कारवाईचा बडगा उगारण्यात आला आहे. त्यांच्याकडून दंडापाेटी तब्बल ५३ हजार ३०० रूपये वसूल करण्यात आले आहेत. कारवाईची ही माेही यापुढेही सुरूच राहणार आहे. त्यामुळे चालकांनी वाहतूक नियमांचे पालन करावे, असे आवाहन जिल्हा पाेलीस अधीक्षक कार्यालयाकडून करण्यात आले.
जुगार अड्ड्यावर छापा, गुन्हा दाखल
उस्मानाबाद - शहरातील आनंदनगर व एका हाॅटेलच्या पाठीमागे सुरू असलेल्या जुगार अड्ड्यावर पाेलिसांनी अचानक छापा मारला. या कारवाईत १ हजार ७२० रूपये व जुगाराचे साहित्य जप्त करण्यात आले. याप्रकरणी कमलेश उत्तम मसणे व दिनेश पंडित वाघमारे यांच्याविरूद्ध आनंदनगर पाेलीस ठाण्यात गुन्हा नाेंदविण्यात आला आहे. प्रकरणाचा अधिक तपास पाेलीस करीत आहेत.
अवैध दारूविक्री, मुद्देमाल केला जप्त
उस्मानाबाद -परंडा ते जवळा या मार्गावरील घारगाव फाटा परिसरात छापा टाकून अवैध दारूविक्री करणाऱ्यावर कारवाई केली. यावेळी परंडा ठाण्याच्या पथकाने घटनास्थळावरून विदेशी दारूच्या ९६ बाटल्या जप्त केल्या. या प्रकरणी विशाल कडवणे (रा. परंडा) याच्याविरूद्ध महाराष्ट्र मद्य निषेध कायद्याअंतर्गत परंडा ठाण्यात गुन्हा दाखल करण्यात आला आहे.