पत्नीचा 'तो' व्हिडीओ पाहून पतीने स्वतःला संपवलं; महाराष्ट्रातल्या बॉयफ्रेंडसोबत मिळून देत होती त्रास

हरियाणामध्ये एका तरुणाने पत्नी आणि तिच्या प्रियकराच्या त्रासाला कंटाळून जीवन संपवले

Rohtak Magan Death: हरियाणाच्या रोहतकमधून एक हादरवणारी घटना समोर आली आहे. रोहतकमध्ये एका पतीने पत्नी आणि तिच्या प्रियकराच्या छळाला कंटाळून आत्महत्या केली. आत्महत्या करण्यापूर्वी मृत पतीने एक व्हिडिओ बनवला होता ज्यामध्ये त्याने पत्नी आणि तिचा प्रियकर मानसिक त्रास देत असल्याची तक्रार केली होती. पत्नीने तिच्या प्रियकरासोबतचा अश्लील डान्सचा व्हिडिओ पतीला पाठवल्यानंतर त्याने टोकाचे पाऊल उचललं. या घटनेनंतर मृताचे कुटुंबिय आरोपी पत्नी आणि तिच्या प्रियकरावर कठोर कारवाईची मागणी करत आहेत. मुलाच्या वेदनादायक मृत्यूने सर्वांना धक्का बसला आहे आणि ते अस्वस्थ झाले आहेत.

रोहतकमधील दोभ गावातील रहिवासी मगनने गेल्या आठवड्यात पत्नी आणि प्रियकराच्या छळाला कंटाळून आत्महत्या केली. पत्नी दिव्या आणि तिच्या पोलिस निरीक्षक प्रियकराला कंटाळून पती मगन उर्फ ​​अजयने आत्महत्या केली होती. दिव्याच्या ज्या व्हिडीओमुळे मगनने आयुष्य संपवलं तो आता समोर आला असून सोशल मीडियावर व्हायरल होतं आहे. या व्हिडिओमध्ये दिव्या नाचत आहे आणि पोलीस असलेला प्रियकर तिचा व्हिडिओ बनवत आहे. व्हिडिओत असलेली व्यक्ती महाराष्ट्रातील पोलीस अधिकारी असल्याचे समोर आलं. महाराष्ट्रातील इगतपुरी येथून समोर आलेल्या व्हिडिओमध्ये दिव्या तिच्या प्रियकर दीपकसोबत दिसत आहे. व्हिडिओ रेकॉर्ड करताना, दोघेही अश्लील कृत्ये करताना दिसतात.

कुटुंबाच्या म्हणण्यानुसार, हा व्हिडिओ दिव्याने तिच्या मगनला पाठवला होता. त्यानंतर, त्याने नैराश्यात येऊन ३ दिवसांपूर्वी गळफास घेऊन आत्महत्या केली. मृत्यूपूर्वी मगनने एक व्हिडिओ बनवला ज्यामध्ये त्याने सांगितले की, दिव्या मला माझ्या वडिलांना मारण्यासाठी आणि वडिलोपार्जित जमीन विकण्यास सांगत होती कारण तिच्या पोलिस बॉयफ्रेंडला बढतीसाठी पैशांची आवश्यकता होती. १८ जून रोजी रात्री उशिरा रोहतकमधील दोभ येथे मगनचा मृतदेह झाडाला लटकलेल्या अवस्थेत आढळला होता. आत्महत्या करण्यापूर्वी मगनने त्याच्या सोशल मीडिया अकाउंटवर हा व्हिडिओ पोस्ट केला होता, ज्यामध्ये तो आत्महत्या करण्याबद्दल बोलले होता.  कुटुंबातील सदस्यांनी तो व्हिडिओ पाहिला आणि मगनचा शोध सुरू केला. त्यानंतर त्यांना मगनचा मृतदेह सापडला. कुटुंबियांनी पोलिसांना याची माहिती दिली. पोलिसांनी कुटुंबातील सदस्यांचे जबाब नोंदवून गुन्हा दाखल केला. 

मगन व्हिडिओमध्ये काय म्हणाला?

"माझी पत्नी दिव्याचे दीपकशी प्रेमसंबंध आहेत. तो पोलीस आहे आणि महाराष्ट्रातील छत्रपती संभाजीनगर येथे राहतो. ते दोघेही मिळून मला मानसिक त्रास देत आहेत. दोघे मिळून मला माझ्या वडिलांना मारून जमीन विकण्यास सांगत होते. ते म्हणत होते की मी माझी वडिलोपार्जित जमीन विकावी. त्या पैशातून आपण मुंबईत एक फ्लॅट खरेदी करू. मी त्यांच्यासाठी माझ्या वडिलांना मारू शकत नाही, म्हणून मी आत्महत्या करत आहे. दीपकला नोकरीत बढतीसाठी ५ लाख रुपयांची आवश्यकता होती. त्यासाठी त्याने माझ्यावर दबाव आणला होता. मग मी गहू विकताच दिव्याला १.५ लाख रुपये दिले. यानंतर, ९ जूनला सोन्याचे कडे गहाण ठेवून दोन लाख रुपये दिले. तरीही ते अजून पैसे मागत होते, असं मगनने म्हटलं.

लग्नाच्या दीड वर्षानंतर, मला कळले की दिव्या आधीच विवाहित होती आणि तिला एक मुलगा आहे. तिने घटस्फोट न घेता माझ्याशी लग्न केले. जेव्हा मी या प्रकरणात वकिलाचा सल्ला घेतला तेव्हा त्यांनी मला तिच्याविरुद्ध खटला दाखल करण्यास सांगितले. तरीही, मी तक्रार केली नाही आणि तिच्या पहिल्या पतीपासून सुटका मिळवण्यासाठी पैसे दिले होते, असंही मगनने म्हटलं.

 २०१९ मध्ये मगनचा दिव्याशी सोशल मीडियावर बोलणं झालं होतं. त्यानंतर दोघांनीही लग्न केले. सुरुवातीला कुटुंबातल्या लोकांना हे मान्य नव्हतं. मात्र जेव्हा दिव्याने मुलाला जन्म दिला तेव्हा कुटुंबातील सदस्यांनीही होकार दिला. दिव्या २० मार्च २०२५ रोजी नोकरीसाठी बाहेर जात असल्याचे सांगून घराबाहेर पडली होती. त्यानंतर तिच्याशी १-२ वेळा फोनवर बोलणं झालं, पण ती घरी परतलीच नाही. नंतर कळले की ती तिच्या प्रियकर दीपकसोबत महाराष्ट्रातील इगतपुरी येथे राहत होती. तिथून फोन करून ती मगनला त्रास देत होती, असं कुटुंबियांनी म्हटलं.