डोशाच्या पिठात विष कुणी कालवले? सख्ख्या पित्यावर पोलिसांचा संशय; घरामध्ये सापडल्या सल्फासच्या गोळ्या!

अहमदाबादच्या चांदखेडा येथील दोन मुलींच्या मृत्यू प्रकरणाचा धक्कादायक खुलासा. डोसा खाल्ल्याने नाही तर विषप्रयोगामुळे मुलींचा मृत्यू झाल्याचे एफएसएल रिपोर्टमध्ये समोर आले आहे

अहमदाबादच्या चांदखेडा परिसरात दोन चिमुरड्या मुलींच्या संशयास्पद मृत्यू प्रकरणाला आता एक धक्कादायक वळण मिळाले आहे. सुरुवातीला ज्या घटनेला फूड पॉयझनिं समजले जात होते, ती प्रत्यक्षात अन्नातून दिलेले विष असल्याचे एफएसएल अहवालातून स्पष्ट झाले आहे. या घटनेने संपूर्ण गुजरात हादरले असून पोलीस आता हत्या की सामूहिक आत्महत्या, या दोन्ही बाजूंनी तपास करत आहेत.

डोसा खाल्ला अन् होत्याचे नव्हते झाले!

१ एप्रिलच्या रात्री विमल प्रजापती याने बाहेरून तयार डोशाचे पीठ आणले होते. घरात डोसे बनवून सर्वांनी खाल्ले, मात्र त्यानंतर काही वेळातच संपूर्ण कुटुंबाची प्रकृती बिघडली. उपचारादरम्यान दोन्ही मुलींचा मृत्यू झाला. 'एफएसएल'च्या अहवालानुसार, या मुलींचा मृत्यू अन्नाच्या विषबाधेमुळे नाही, तर त्यांच्या शरीरात विषारी घटक गेल्यामुळे झाला आहे. धक्कादायक बाब म्हणजे, मुलींचे वडील विमल आणि आई भावना यांच्या रक्ताच्या नमुन्यातही तेच विषारी घटक सापडले आहेत.

सल्फासच्या गोळ्यांचे रहस्य काय?

तपासादरम्यान पोलिसांना विमलच्या घरातून 'सल्फास'च्या गोळ्या सापडल्या आहेत. हे कीटकनाशक साधारणपणे धान्य साठवण्यासाठी वापरले जाते. हेच विष डोशाच्या पिठात आधीच होते की कुणी जाणीवपूर्वक त्यात मिसळले, याचा शोध आता पोलीस घेत आहेत. मुलींच्या आजोबांचे मेडिकल स्टोअर असल्याने, हे विष तिथून आले का? याचीही चौकशी सुरू आहे.

पित्यावर संशयाचे मळभ; तणाव की विवंचना?

पोलिसांनी दिलेल्या माहितीनुसार, विमल प्रजापती हा गेल्या अनेक दिवसांपासून बेरोजगार होता. मॉडेलिंगमध्ये करिअर करण्याची त्याची इच्छा होती आणि तो ऑस्ट्रेलियाला जाण्याच्या तयारीत होता. आर्थिक तंगी आणि घरगुती कलहामुळे तो तणावात असल्याची माहिती समोर आली आहे. त्यातच, मुलाच्या आशेपोटी दुसऱ्या मुलीचा जन्म झाल्याने कुटुंबात वाद होते का, या कोनातूनही तपास सुरू आहे.

सीसीटीव्ही आणि कॉल रेकॉर्ड्सवर नजर

गुन्हे शाखेने आता स्थानिक औषधांची दुकाने आणि परिसरातील सीसीटीव्ही फुटेज तपासण्यास सुरुवात केली आहे. विमल आणि भावना सध्या रुग्णालयातील आयसीयूमध्ये भरती आहेत. विमलची प्रकृती स्थिर असली तरी भावनाची प्रकृती अद्याप गंभीर आहे. आई-वडील शुद्धीवर आल्यानंतरच या मृत्यूच्या रात्रीचे नेमके रहस्य उलगडण्याची शक्यता आहे.