उत्तर प्रदेशातील कौशांबी जिल्ह्यातील पइन्सा पोलीस ठाण्यापासून काही अंतरावर असलेल्या निवृत्त न्यायाधीशाच्या घरात चोरीची घटना घडली आहे. मंगळवारी रात्री घडलेल्या या घटनेत चार चोरांनी घरात घुसून सर्व ऐवज लंपास केला. सुरेश चंद्र हे आपल्या कुटुंबासह लखनौमध्ये राहत आहेत. शेजारी राहणाऱ्या अमित कुमार यांना काही संशयास्पद हालचाली जाणवल्या, त्यानंतर त्यांनी गावकऱ्यांना बोलावलं.
ग्रामस्थ आल्यानंतर चोर घाबरून पळू लागले. यातील एक चोर गुफरान अहमद याला गावकऱ्यांनी पकडून पोलिसांच्या ताब्यात दिले, तर इतर चोरटे पळून जाण्यात यशस्वी झाले. पोलिसांनी गुफरानला ताब्यात घेऊन गुन्हा दाखल करून त्याची रवानगी जेलमध्ये केली असून चौकशी सुरू केली आहे.
यावेळी घटनास्थळाजवळील तलावात अरबाज नावाच्या चोराचा मृतदेह तरंगताना आढळून आल्याने परिसरात खळबळ उडाली आहे. पळताना अरबाजने तलावात उडी मारली आणि रात्रीच्या अंधारात बाहेर येऊ न शकल्याने त्याचा मृत्यू झाल्याचे सांगण्यात येत आहे. पोलिसांनी घटनास्थळ गाठून मृतदेह शवविच्छेदनासाठी पाठवला आणि घटनेची माहिती मृताच्या कुटुंबीयांना दिली.
याप्रकरणी एसपी ब्रिजेश कुमार श्रीवास्तव यांनी दिलेल्या माहितीनुसार, पोलीस स्टेशन हद्दीत चार चोरांनी चोरीसाठी घरात घुसखोरी केली होती. गावकऱ्यांनी एका चोराला पकडून पोलिसांच्या स्वाधीन केलं, तर पळून जात असताना दुसरा चोर तलावात पडला आणि पाण्यात बुडून त्याचा मृत्यू झाला. इतर फरार चोरांचा शोध सुरू आहे.