Truck Bar Accident: कॅरेबियन बेटांवरील देश डॉमिनिकन रिपब्लिकमध्ये एका बारमध्ये ट्रक घुसल्याने ११ जणांचा मृत्यू झाल्याची दुर्दैवी घटना घडली. या घटनेत ३० हून अधिक जण जखमी झाले आहेत. सिव्हिल डिफेन्सचे संचालक जुआन सालास यांनी सांगितले की, राजधानी सँटो डोमिंगोच्या पश्चिमेला असलेल्या अझुआच्या दक्षिणेकडील विभागात रविवारी पहाटे हा अपघात झाला. अपघात कशामुळे झाला हे अद्याप स्पष्ट झाले नाही. तपास अधिकारी परिसरातील सीसीटीव्ही कॅमेरे तपासत आहेत.
अपघातानंतर चालक फरार
पोलिस प्रवक्ते डिएगो पेस्केरा यांनी सांगितले की, पीडितांपैकी एक पोलिस कर्मचारीही आहे. ट्रकचा चालक घटनास्थळावरून पळून गेला आणि त्याचा पत्ता लागलेला नाही. पोलिसांनी ट्रकमधील एका प्रवाशाला ताब्यात घेतले. तो ॲव्होकॅडो घेऊन जात होते. जखमींना जवळच्या रुग्णालयात दाखल करण्यात आले आहे. त्यांच्या प्रकृतीबाबत अद्याप माहिती मिळू शकलेले नाही.
आणखी एका अपघातात सात जणांचा मृत्यू
अमेरिकेतील मिसिसिपी येथे बस उलटून सात जणांचा मृत्यू झाला असून ३७ जण जखमी झाले. ही माहिती देताना मिसिसिपी हायवे पेट्रोलने सांगितले की, या अपघातात सहा प्रवाशांचा जागीच मृत्यू झाला, तर अन्य एकाचा रुग्णालयात मृत्यू झाला. टायर फुटल्याने हा अपघात झाल्याचे नॅशनल ट्रान्सपोर्टेशन सेफ्टी बोर्डाने ट्विटरवर पोस्ट केले. वॉरेन काउंटीचे कोरोनर डग हस्की यांनी सांगितले की मृतांमध्ये सहा वर्षांचा मुलगा आणि त्याची १६ वर्षांची बहीण यांचा समावेश आहे.