एकाच कंपनीत असलेल्या महिलेला लग्नाचे आमिष दाखवत लैंगिक अत्याचार

पीडित महिला आणि आरोपी हे दोघे एकाच कंपनीत कामाला असून ते एकमेकांच्या ओळखीचे आहेत.

ठळक मुद्देहिंजवडी पोलिसांनी तरुणाला केली अटक

पिंपरी : एकाच कंपनीत नोकरीस असलेल्या महिलेशी मैत्री करून तिला लग्नाचे आमिष दाखविले. तसेच तिच्या मुलाला सांभाळतो असे सांगून महिलेवर लैंगिक अत्याचार केले. बावधन व सूसगाव, बाणेर येथे २८ फेब्रुवारी २०१९ ते २ जुलै २०२० दरम्यान हा प्रकार घडला. याप्रकरणी पोलिसांनी एका तरुणाला अटक केली.याप्रकरणी ३५ वर्षीय पीडित महिलेने रविवारी (दि. ५) हिंजवडी पोलीस ठाण्यात फिर्याद दिली. तर किवित अशोक पाटील (वय ३०, रा. सूसगाव, ता. मुळशी) असे अटक केलेल्या तरुणाचे नाव आहे. पोलिसांनी दिलेल्या माहितीनुसार, पीडित महिला आणि आरोपी हे दोघे एकाच कंपनीत कामाला असून ते एकमेकांच्या ओळखीचे आहेत. आरोपी याने महिलेशी मैत्री करून तिला लग्नाचे आमिष दिले. महिलेच्या मुलाला सांभाळतो, असे सांगून आरोपी याने स्वत:च्या घरी व महिलेच्या घरी महिलेवर लैंगिक अत्याचार केले. यात महिला गरोदर राहिली. त्यांनी एका खासगी रुग्णालयात गर्भपात केला. याप्रकरणी बलात्काराचा गुन्हा दाखल केला असून पोलिसांनी आरोपी याला अटक केली. हिंजवडी पोलीस तपास करीत आहेत.