उमेदवारी देण्याच्या नावाखाली बलात्कार; मनसे पदाधिकाऱ्याला गिरगावातून अटक

मुंबई महापालिका निवडणुकीसाठी प्रत्येक पक्ष ताकदीनिशी उतरणार आहेत. त्यातच इच्छुक उमेदवारांची गर्दीही वाढत आहे. गिरगावातील रहिवासी असलेले वडके हे मनसे विभागप्रमुख आहे

मुंबई : महाराष्ट्र नवनिर्माण सेनेच्या पदाधिकाऱ्याने महिलेला मारहाण केल्याचे प्रकरण ताजे असतानाच आगामी मुंबई महापालिका निवडणुकीत पक्षाकडून उमेदवारी देण्याचे आमिष दाखवत मनसे पदाधिकाऱ्याने बलात्कार केल्याची धक्कादायक घटना गिरगावमध्ये घडली आहे. तसेच याबाबत कुठेही वाच्यता करू नये म्हणून महिलेला धमकावल्याचा आरोपही आहे. याप्रकरणी व्ही. पी. रोड पोलिसांनी वृशांक वडके या मनसे पदाधिकाऱ्याला बेड्या ठोकल्या आहेत.

मुंबई महापालिका निवडणुकीसाठी प्रत्येक पक्ष ताकदीनिशी उतरणार आहेत. त्यातच इच्छुक उमेदवारांची गर्दीही वाढत आहे. गिरगावातील रहिवासी असलेले वडके हे मनसे विभागप्रमुख आहे. त्याने एका महिलेला निवडणुकीसाठी तिकीट देण्याचे आश्वासन दिले होते. मात्र, त्यानंतर वडकेची मागणी वाढत असल्याने महिलेने पोलिसात धाव घेत तक्रार दिली. उमेदवारी देण्याच्या बहाण्याने वडके याने सप्टेंबर २०२१ ते जुलै २०२२ या दरम्यानच्या काळात बलात्कार केल्याचा आरोप महिलेने केला आहे. याप्रकरणी पोलिसांनी भादंवि कलम ३७६, ५०० आणि ४२० अंतर्गत गुन्हा नोंदविला असून, अधिक तपास सुरू आहे.