कोण आहे मिस्ट्री गर्ल?; सोनमशी होते कनेक्शन; राजा रघुवंशी हत्या प्रकरणाला नवं वळण

राजा रघुवंशी हत्या प्रकरणात सोनमसह तिचा कथित प्रियकर राज कुशवाह आणि अन्य तिघांना अटक करण्यात आली आहे.

इंदूर - मेघालय राजा रघुवंशी हत्याकांड प्रकरणी नवं वळण लागले आहे. या खळबळजनक प्रकरणात आता एका रहस्यमय मुलगी अलकाची एन्ट्री झाली आहे. अलका ही मुख्य आरोपी सोनम रघुवंशी हिची जवळची मैत्रिण आहे. राजाच्या कुटुंबाने अलकाच्या भूमिकेवर गंभीर प्रश्न उपस्थित करत राजाच्या हत्याकांडात तिचाही समावेश असू शकतो अशी शंका उपस्थित केली आहे.

राजाचा मोठा भाऊ विपिन रघुवंशी म्हणाला की, अलका आणि सोनम जवळच्या मैत्रिणी आहेत. त्यामुळे राजाच्या हत्येचा जो कट रचला गेला त्यात तिचाही समावेश असू शकतो. पोलिसांनी तिची कसून चौकशी करावी. त्याशिवाय सोनमची नार्को टेस्ट करावी जेणेकरून या प्रकरणातील सत्य समोर येऊ शकेल अशीही मागणी त्यांनी केली. 

तसेच सोनमसोबत अलकाचे वागणेही संशयास्पद वाटत होते. मेघालय पोलिसांनी अद्याप अलकाच्या भूमिकेबाबत अधिकृत प्रतिक्रिया दिली नाही. सूत्रांनुसार, विशेष तपास पथक अलकाच्या भूमिकेचा शोध घेत आहे. अलका हिच्या एन्ट्रीने या हत्याकांड प्रकरणाचा तपास आणखी जटील बनला आहे. आता तपासात अलकाच्या भूमिकेबाबत काय खुलासा होतो, ती फक्त सोनमची मैत्रिण आहे की हत्याकांडात तिचाही काही हात आहे हे तपासातून समोर येईल. 

दरम्यान, राजा रघुवंशी हत्या प्रकरणात सोनमसह तिचा कथित प्रियकर राज कुशवाह आणि अन्य तिघांना अटक करण्यात आली आहे. २ जून रोजी सोहराच्या वेइसाडोंग फॉल्सजवळ राजाचा मृतदेह छिन्नविछिन्न अवस्थेत सापडला.  त्यानंतर ९ जून रोजी सोनमने गाजीपूर येथे सरेंडर केले. राजा रघुवंशी हत्या प्रकरणात सोनमची नार्कोटेस्ट केल्यानंतर या प्रकरणाच्या मुळाशी जाऊ शकतो असं राजाच्या कुटुंबाने म्हटलं आहे. 

"लग्न ठरल्यानंतरही फारसे बोलत नव्हते"

 लग्नाच्या एक दिवस आधी झालेल्या कार्यक्रमात स्टेजवर सूत्रसंचालकाची भूमिका बजावणारा राजा रघुवंशीचा मित्र राज कुलहारे याने मोठा खुलासा केला आहे. लग्न ठरल्यानंतर सोनम राजाला बोलण्यासाठी वेळच देत नव्हती. राज कुलहारे आणि राजा रघुवंशी हे एकमेकांचे चांगले मित्र होते. दोघेही त्यांच्या वैयक्तिक आयुष्याबद्दल गोष्टी शेअर करायचे. राज कुल्हारे याने मुलाखतीत सोनम आणि राजा रघुवंशीबद्दल अनेक गोष्टी सांगितल्या आहेत. "लग्न ठरल्यानंतर राजा आणि सोनम दिवसातून फक्त १० मिनिटं बोलत होते. अनेकदा सोनम व्यस्त असल्याचं कारण दाखवून राजाशी बोलण्यास नकार देत असे."